მოკლედ: სოციალური სამართლიანობის ცენტრის (SJC) შეფასებით, რელიგიური ნაგებობებისა და ნივთების შეურაცხყოფის კრიმინალიზების ინიციატივა, შესაძლოა, წინააღმდეგობაში მოდიოდეს გამოხატვის თავისუფლებით დადგენილ საერთაშორისო სტანდარტებთან.

დეტალები: SJC წერს, რომ ევროპული სასამართლოს პრაქტიკის თანახმად, გამოხატვის თავისუფლების დაცვის ფარგლები ვრცელდება, როგორც უმრავლესობისათვის მისაღებ, პოპულარულ და ნეიტრალურ მოსაზრებებზე, ასევე:

  • "ისეთ გამოხატვასა და შეხედულებაზეც, რომელიც შოკისმომგვრელი, შემაწუხებელი ანდა შეურაცხმყოფელია სახელმწიფოსათვის თუ საზოგადოების ნებისმიერი ნაწილისათვის";
  • SJC-ის მიხედვით, ევროპული სასამართლო არაგონივრულს უწოდებს, როგორც რელიგიური უმცირესობების, ისე — დომინანტური რელიგიების მიმდევარი პირების მოლოდინს, რომ მათ რწმენასა და შეხედულებებს არავინ გააკრიტიკებს;
  • "სასამართლო აღნიშნავს, რომ მორწმუნე პირები ვალდებულნი არიან, მიიღონ და ტოლერანტობა გამოიჩინონ მათი რწმენის შესახებ გამოთქმული კრიტიკისა და უარყოფის მიმართ", — წერს სოციალური სამართლიანობის ცენტრი;

SJC წერს, რომ ადამიანის უფლებათა დაცვის უმაღლესი კომისარის რეკომენდაციით,

  • "სახელმწიფოებმა, რომლებსაც აქვთ რელიგიის შეურაცხყოფის შესახებ კანონები, უნდა გააუქმონ ისინი, რადგან ასეთ კანონებს აქვთ დამახინჯებული გავლენა რელიგიის, ან რწმენის თავისუფლებით სარგებლობაზე და რელიგიის შესახებ ჯანსაღ დიალოგსა და დებატებზე".

ბოლო ხაზი: 11 იანვარს საქართველოს პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა დაანონსა ახალი კანონპროექტი რელიგიური ნაგებობებისა და ნივთების შეურაცხყოფის კრიმინალიზების შესახებ

  • "უახლოეს პერიოდში დავაინიციირებთ საკანონმდებლო ცვლილებებს, რომ გამკაცრდეს სისხლისსამართლებრივ პასუხისმგებლობა რელიგიური ნაგებობებისა და ნივთების შეურაცხყოფისათვის".
  • ოხანაშვილი ახალი ინიციატივით მას შემდეგ გამოვიდა, რაც სამოქალაქო აქტივისტმა ნატა ფერაძემ მატრონა მოსკოველის ხატს, სადაც სტალინია გამოსახული, საღებავი შეასხა.