ჯიფსი როუზ ბლანჩარდი, რომელიც საკუთარი დედის მკველობაშია დამნაშავე, 28 დეკემბერს ციხიდან გამოვიდა. 2015 წლის ივნისში ჯიფსიმ თავის იმდროინდელ შეყვარებულ ნიკთან ერთად, დედამისის მკვლელობა დაგეგმა. ჯიფსის მკვლელობის დაგეგმვისთვის 10 წლით თავისუფლების აღკვეთა მიუსაჯეს და დროზე ადრე გაათავისუფლეს, ნიკს კი, მკვლელობის ჩადენისთვის მთელი ცხოვრების ციხეში გატარება მოუწევს.

როგორც ცნობილია, ჯიფსის დედას მიუნჰაუზენის სინდრომი ჰქონდა, რის გამოც მთელი ცხოვრება სჯეროდა და შვილსაც აჯერებდა, რომ ჯიფსის სხვადასხვა დაავადება ჰქონდა და ამ დაავადებების სიმპტომებს წამლების თუ სამედიცინო პროცედურების მეშვეობით ხელოვნურად იწვევდა.

ჯიფსის თქმით, დედამისისგან წლების განმავლობაში ფიზიკური და ფსიქოლოგიური ძალადობის მსხვერპლი იყო და მის გამო მთელი ცხოვრება არასაჭირო სამედიცინო პროცედურებს უტარებდნენ, რამაც საბოლოოდ, მიიყვანა იქამდე, რომ ნიკი დედის მკვლელობაში დაერწმუნებინა.

ჯიფსის თქმით, როდესაც 7 წლის იყო, დედამისი ამტკიცებდა, რომ მას კუნთოვანი დისტროფია და ლეიკემია ჰქონდა, რის გამოც შვილს თავი გადაპარსა და ეტლით გადაადგილება დააწყებინა, მიუხედავად იმისა, რომ ჯიფსის სიარული შეეძლო.

ჯიფსის მტკიცებით, მაშინ სჯეროდა, რომ დედის მკვლელობის გარდა, სხვა გზა არ ჰქონდა. ის ჰყვება, რომ სახლიდან გაქცევა სცადა, მაგრამ დედამ მისი დაჭერა შეძლო. იურიდიულად, ჯიფსის მეურვე დედამისი იყო და ჯიფსის დამოუკიდებლად არანაირი გადაწყვეტილების მიღება არ შეეძლო.

ციხიდან გამოსვლამდე 1 დღით ადრე, ჯიფსიმ ინტერვიუში თქვა, რომ დედის მკვლელობას ყოველდღე ნანობს და ფიქრობს, რომ მისი მოკვლის ნაცვლად, პოლიციისთვის უნდა მიემართა.

"უკან დაბრუნება რომ შემეძლოს, იქნებ, ბავშვობაში ნათესავებისთვის მეთქვა, რომ სინამდვილეში არაფერი მჭირდა და დედა ავად ძალით მხდიდა. იქნებ, უბრალოდ იმ მომენტში დავბრუნებულიყავი, როცა ნიკთან ერთად მისი მკვლელობა დავგეგმე და ამის ნაცვლად, ყველაფრის პოლიციისთვის თქმა გადამეწყვიტა. ამაზე ფიქრი მტანჯავს", — ამბობს ჯიფსი.

ჯიფსის თქმით, უნდა, სხვა ადამიანები, რომლებიც ძალადობრივ ურთიერთობაში არიან, დაარწმუნოს, რომ მკვლელობა არ ჩაიდინონ და ნებისმიერი სხვა გზა იპოვონ სიტუაციიდან თავის დასაღწევად.

ჯიფსი ციხეში ყოფნის პერიოდში დაქორწინდა და რადგან ახლა თავისუფალია, ოჯახის შექმნასა და შვილების ყოლას გეგმავს.

ჯიფსის ისტორიაზე 2017 წელს დოკუმენტური ფილმი გამოვიდა, მოგვიანებით კი, 2019 წელს, Hulu-მ სერიალი The Act გადაიღო, რომელშიც ჯიფსისა და მისი დედის როლებს ჯოუი კინგი და პატრისია არკეტი ასრულებენ.

ჯიფსის ისტორია დოკუმენტურ სერიალ The Prison Confessions of Gypsy Rose Blanchard-ში გაგრძელდება, რომელიც მის ციხეში ყოფნის პერიოდსა და მისი ცხოვრების აქამდე უცნობ დეტალებზე იქნება. შოუში ჯიფსის ქმარი, მამა და დედინაცვალიც გამოჩნდებიან. სერიალის პრემიერა 5 იანვარს შედგება.