მოკლედ: ალექსეი ნავალნი, რომელთან დაკავშირებასაც, უკვე 20 დღეზე მეტია, ვერ ახერხებდნენ, გამოჩნდა.

  • მისი წერილი სოციალურ ქსელში გამოაქვეყნეს.

დეტალები: ნავალნი წერს, რომ ვლადიმირის ოლქიდან, სადაც ის სასჯელს იხდიდა, ჩრდილოეთით, სოფელ ხარპში მდებარე სპეციალური რეჟიმის კოლონიაში გადაიყვანეს.

ასევე, ჰყვება, რომ ეტაპირების 20 დღე დამღლელი იყო, თუმცა "შესანიშნავ განწყობაზეა".

  • "აქ შაბათ საღამოს ჩამომიყვანეს. ისეთი სიფრთხილით და უცნაური მარშრუტით გადმომიყვანეს (ვლადიმირი - მოსკოვი - ჩელიაბინსკი - ეკატერინბურგი - კიროვი - ვორკუტა - ხარპი), რომ არ მეგონა, აქ იანვრის შუა რიცხვებამდე თუ ვინმე მომაგნებდა.
  • ამიტომ, ძალიან გამიკვირდა, როცა გუშინ გაიღო კამერის კარი და მითხრეს: "თქვენთან ადვოკატია". [ადვოკატმა] მითხრა, რომ თქვენთვის დავიკარგე, ზოგი ამის გამო ნერვიულობდა კიდეც. დიდი მადლობა მხარდაჭერისთვის!" — წერს ნავალნი წერილში.
  • ის ჰყვება, რომ სასეირნოდ გაჰყავთ გვერდით მდებარე საკანში, სადაც, იატაკზე თოვლი დევს, ხოლო პატიმრის საკნის ფანჯრიდან კი მხოლოდ ღობე ჩანს.
  • "ჩემ გამო ნუ ინერვიულებთ, მე კარგად ვარ, ძალიან მიხარია, რომ, ბოლოს და ბოლოს, ჩამოვედი," — ამბობს ნავალნი.

ბოლო ხაზი: რუსი ოპოზიციონერი პოლიტიკოსის ადგილსამყოფელის შესახებ, მისი ეტაპირების პერიოდში, ინფორმაცია არც ოჯახს და არც ადვოკატს არ ჰქონდა.

  • ამის გამო შეშფოთება გამოთქვეს როგორც მისმა მხარდამჭერებმა და უფლებადამცველებმა, ისე — საერთაშორისო საზოგადოების წარმომადგენლებმა, მათ შორის, ევროკავშირის უმაღლესმა წარმომადგენელმა, ჯოზეფ ბორელმა.