მოკლედ: ცეტრალური საარჩევნო კომისია სიცრუეს უწოდებს ინფორმაციას, თითქოს საარჩევნო ადმინისტრაცია უარს ამბობს საზღვარგარეთ საარჩევნო უბნების შექმნაზე.

დეტალები: უწყებაში ამბობენ, რომ ყველაფერს გააკეთებენ, რათა საზღვარგარეთ მყოფმა ამომრჩევლებმა შეძლონ არჩევნებში მონაწილეობა.

თუმცა, ამისთვის საჭიროა, მათ კანონით გაწერილი პროცედურები დაიცვან.

განცხადებაში წერია, რომ:

  • საარჩევნო კოდექსის თანახმად, სხვა ქვეყნებში საარჩევნო უბნებს ქმნის ცესკო არჩევნების დღემდე არაუგვიანეს 30-ე დღისა, საქართველოს საგარეო საქმეთა სამინისტროს მონაცემების საფუძველზე.
  • უბნები იქმნება არანაკლებ 50 და არაუმეტეს — 3 000 ამომრჩევლისათვის.
  • არჩევნებში მონაწილეობის მისაღებად, მნიშვნელოვანია, თითოეულმა მათგანმა არჩევნების დღემდე არაუგვიანეს მე-19 დღისა, რეგისტრაცია გაიაროს სხვა სახელმწიფოში შექმნილ საუბნო საარჩევნო კომისიაში, საზღვარგარეთ საქართველოს დიპლომატიურ წარმომადგენლობაში, ან — საქართველოს საკონსულო დაწესებულებაში.
  • ასევე, ცესკო აღნიშნავს, რომ საარჩევნო კოდექსში შესული ცვლილებების თანახმად, საზღვარგარეთ მცხოვრები ამომრჩევლებისთვის. საარჩევნო რეგისტრაციის ვადა ორი დღით გაიზარდა.

ცესკო მიმართავს სხვა ქვეყნებში მცხოვრებ ამომრჩევლებს, საარჩევნო პროცედურებთან დაკავშირებული სანდო ინფორმაციისთვის დაუკავშირდნენ საარჩევნო ადმინისტრაციას და ისარგებლონ გადამოწმებული წყაროებით.

"ასევე, მოვუწოდებთ ყველა ჩართულ მხარეს, გაითვალისწინონ და დაიცვან საარჩევნო პროცედურები, პოლიტიკური მიზნებიდან გამომდინარე ნუ შეიყვანენ ამომრჩევლებს შეცდომაში და ნუ დააზიანებენ საარჩევნო გარემოს. არჩევნები საერთო საქმეა და ყველას აქვს თავისი წილი პასუხისმგებლობა ამ პროცესის საერთაშორისო სტანდარტებით განხორციელების საქმეში",— წერია ცესკო-ს განცხადებაში.