ელისო კილაძის შვილი, დავით ხარჩილაძე, თბილისის საქალაქო სასამართლომ 15 000 ლარიანი გირაოს სანაცვლოდ გაათავისუფლა.

ელისო კილაძე On.ge-სთან საუბრისას ამბობს, რომ ამ დრომდე, სასამართლომ დაცვის მხარეს ხუთჯერ უთხრა უარი აღკვეთი ღონისძიების გირაოთი შეცვლაზე და ამ არგუმენტით დღეს ხარჩილაძის ადვოკატები სტრასბურგის სასამართლოში სარჩელის გაგზავნას აპირებდნენ.

"დღეს სასამართლომ როცა მოისმინა ბრალდების მხარის პოზიციები, მოისმინა დაცვის მხარის ყველა მოწმე და რაც მთავარია, მოუსმინა ჩემს შვილს, რომელმაც დეტალური ჩვენება მისცა, როგორ ჩაუდეს მას ნარკოტიკი, საკუთარი ინიციატივით იმსჯელა აღკვეთი ღონისძიების შეცვლაზე და პატიმრობა შეცვალა 15 ათას ლარიანი გირაოთი. 120 დღე გაატარა ჩემმა შვილმა გლდანის საპყრობილეში, ჩვენ იმედს ვიტოვებთ, რომ მოსამართლე სამართლიან გადაწყვეტილებას მიიღებს და ამ საქმეზე გამამტყუნებელი განაჩენი არ დადგება".

ელისო კილაძის შვილის შემდეგი სასამართლო პროცესი 18 ივლისს გაიმართება.

გაზეთ ქრონიკა პლუსის რედაქტორის, ელისო კილაძის, შვილი, დავით ხარშილაძე, 13 მარტს, დააკავეს. 15 მარტს მას თბილისის საქალაქო სასამართლომ აღკვეთის ღონისძიების სახით წინასწარი პატიმრობა შეუფარდა. ხარჩილაძე 0,1626 გრამი ბუპრენორფინის შენახვის ბრალდებითაა დაკავებული. ელისო კილაძე შვილის დაკავებას თავის ჟურნალისტურ საქმიანობას უკავშირებს.