გაზეთ ქრონიკა პლუსის რედაქტორის, ელისო კილაძის შვილი, დავით ხარშილაძე, 13 მარტს, 16 საათზე დააკავეს. ელისო კილაძე On.ge-სთან აცხადებს, რომ მის შვილს დაკავებიდან 3-4 საათის განმავლობაში ზარის განხორციელების უფლება არ მისცეს.

კილაძე აღნიშნულს თავის ჟურნალისტურ საქმიანობას უკავშირებს და ამბობს, რომ მისი შვილის დაკავებით მუქარებს იღებდა.

კილაძის თქმით, მის შვილს ნარკოტიკული საშუალება დაკავებისას ჩაუდეს, ხოლო ჩხრეკისას თვითმხილველებს დასწრების საშუალება არ მისცეს.

კილაძის თქმით, ის დღეს, 14 საათზე პოლიციის მთავარ სამმართველოსთან მივა და თავის სამოქმედო გეგმას გააცნობს საზოგადოებას.

როგორც შსს-ში On.ge-ს განუცხადეს, ელისო კილაძის შვილის დაკავებასთან დაკავშირებით, გამოძიება სისხლის სამართლის კოდექსის 260-ე მუხლითაა დაწყებული, რაც ნარკოდანაშაულს გულისხმობს.

უწყებაში გვითხრეს, რომ გამოძიება მიმდინარეობს და დამატებითი დეტალი მოგვიანებით გახდება ცნობილი.