2 მარტს, საქართველოს მთავრობის სხდომაზე, ვიქტორ დოლიძემ განაცხადა, რომ ალექსი პეტრიაშვილის დაჭრის საქმეზე გამოძიების ნელ ვადებში წარმართვამ შესაძლოა არჩევნებზე, ნატოს სამიტსა და ევროკავშირში უვიზო მიმოსვლასთან დაკავშირებით პრობლემები შეგვიქმნას.

თავისუფალი დემოკრატების წევრმა შს მინისტრს მადლობა გადაუხადა შეხვედრისთვის და მყისიერი რეაგირებისთვის, თან აღნიშნა, რომ საქმის გახსნა არა მხოლოდ მოქალაქეების, ასევე სახელმწიფოს სასიცოცხლო ინტერესებშია:

"მეგობრებო, ეს მარტო ბუკას არ შეეხება. კრიმინოგენული ვითარება საკმაოდ დაძაბულია ჩვენს ქვეყანაში. დღე არ გადის, რომ განზრახ მკვლელობა, განზრახ მძიმე დაზიანება ან რამე მძიმე დანაშაული არ მოხდეს".

ვიქტორ დოლიძეს თქმით, მან გადახედა შს სამინისტროს მონაცემებს, რომლის მიხედვითაც მძიმე დანაშაულის ჩადენის სტატისტიკა საქართველოში გაზრდილია:

"ამას სოციალური და ეკონომიკური ფონიც ხელს უწყობს. შსს იმისთვის არის, რომ დანაშაულის პრევენცია ან უმოკლეს ვადებში მასზე რეაგირება მოახდინოს. რომელ მოქალაქის დაცულობაზეა საუბარი, როცა ყოფილ მინისტრს ასე უსწორდებიან".

ვიქტორ დოლიძემ უმრავლესობის წევრებსა და შესაბამის სამსახურებს მიმართა და საქმის დროულად გამოძიებისკენ და მასზე შესაბამისი კვალიფიკაციის შეცვლისკენ მოუწოდა:

"უამრავი უცხოელი კოლეგა გვირეკავს და დაინტერესებულია ამ ფაქტით. ისინი შეშფოთებას გამოხატავენ იმის გამო, რომ დემოკრატიული საზოგადოებისთვის ასეთი ფაქტები ცუდად მოქმედებს. ამ დღეებში ევროკავშირში უვიზო მიმოსვლასთან დაკავშირებით ახალ ნაბიჯს გადავდგამთ, ნატოს სამიტი მოდის, არჩევნები ახლოვდება. ძალიან ბევრი თემებია, რომლებთან მიმართებაშიც მხოლოდ და მხოლოდ პროგრესი გვჭირდება".

სხდომაზე ამ თემას პარტია გირჩის დამფუძნებელი ზურაბ ჯაფარიძეც გამოეხმაურა:

"არ აქვს მნიშვნელობა ეს დღე ხდება თუ ღამით, როდესაც ყოფილ სახელმწიფო მინისტრს ევროპულ და ევროატლანტიკურ სტრუქტურებში ინტეგრაციის საკითხებში ესვრიან რამდენიმე ტყვიას, საუბარი ქვეყნის წინსვლაზე, დემოკრატიის განვითარებასა თუ ინვესტიციების შემოსვლაზე, არის ზღაპარი. ეს საქმე რაც შეიძლება სწრაფად უნდა გამოიძიონ".

ალექსი პეტრიაშვილი 26 თებერვალს საბურთალოს სასაფლაოზე შეიარაღებულმა უცნობმა პირებმა დაჭრეს. დაშავებულს რამდენიმე გადაუდებელი ოპერაცია ჩაუტარდა. შემთხვევიდან 5 დღის შემდეგ, ის რეანიმაციული განყოფილებიდან პალატაში გადაიყვანეს.

საქმეზე გამოძიება სისხლის სამართლის კოდექსის 177-ე მუხლით მიმდინარეობს, რაც ჯანმრთელობის განზრახ დაზიანებას გულისხმობს. თავისუფალი დემოკრატები გამოძიებისგან საქმეზე კვალიფიკაციის შეცვლას ითხოვენ და აცხადებენ, რომ ეს იყო მკვლელობის მცდელობა და გამოძიება ამ მიმართულებით უნდა წარიმართოს.