აშშ-ში, სწრაფი კვების ობიექტ Chipotle-ში, რესტორნის თანამშრომელ ემილი რასელს შეკვეთა აერია, რის გამოც კლიენტმა, როზმარი ჰეინმა მას ბურიტო ესროლა. ჰეინის წინააღმდეგ საქმე აღიძრა, მან კი თავი იმით იმართლა, რომ "ცუდი დღე ჰქონდა". სასამართლომ განაჩენი უკვე გამოიტანა — ქალი ერთ თვეს ციხეში გაატარებს, ორი თვე კი რომელიმე სწრაფი კვების ობიექტში თავად იმუშავებს.

სასამართლომ თავდაპირველად ქალს 180-დღიანი სასჯელი შეუფარდა, თუმცა არჩევანი მისცა, რომ ციხეში 180 დღის ნაცვლად, 30 დღე ყოფილიყო, შემდეგ კი სწრაფი კვების ობიექტში დაეწყო მუშაობა და იმ ადამიანის როლი მოერგო, რომელსაც თავად შეურაცხყოფა მიაყენა. ჰეინი 60 დღის განმავლობაში, კვირაში მინიმუმ 20 საათს რესტორანში გაატარებს.

დაზარალებული ემილი რასელი Chipotle-ში 4 წლის განმავლობაში მუშაობდა, თუმცა ინციდენტიდან 1 თვის შემდეგ სამსახური დატოვა, რადგან ხელმძღვანელობისგან მხარდაჭერას ვერ გრძნობდა. მისი თქმით, მას შემდეგ, რაც ჰეინმა სახეში საჭმელი ესროლა, კომპანიიდან არავინ დაკავშირებია და მუშაობა შემდეგი 5 საათის განმავლობაშიც მოუწია.

Chipotle-ის წარმომადგენლის თქმით, მათთვის თანამშრომლების უსაფრთხოება და ჯანმრთელობა ყველაზე მნიშვნელოვანია და სასამართლოს გადაწყვეტილებით კმაყოფილები არიან.