საზოგადოებრივი თანასწორობის ცენტრი ფაბრიკაში, 17 ივლისს, 18 საათზე ძალადობის და დისკრიმინაციის მსხვერპლი პირების მხარდასაჭერად ღონისძიებას - "ათვლა იწყება ერთით" -მართავს. საქველმოქმედო ღონისძიება ოჯახური ძალადობის მსხვერპლი იმ პირების საჭიროებების, სწავლისა და ბინის უზრუნველსაყოფად გაიმართება, რომლებიც წლების მანძილზე სახლში ფიზიკური და ფსიქოლოგიური ძალადობის მსხვერპლნი არიან.

17 ივლისს აქციაზე მისულებს ელით ცოცხალი მუსიკა, საკვები და ხელნაკეთი ნივთები. შესული თანხა კი, მთლიანად მოხმარდება ბენეფიციარებს. როგორც აქციის ორგანიზატორები აღნიშნავენ, ონლაინ პლატფორმის მეშვეობით უკვე შეგროვებულია საჭირო თანხის მეოთხედი, 25 პროცენტი.

ძალადობის და დისკრიმინაციის მსხვერპლთა დაცვაზე მომუშავე ორგანიზაცია საზოგადოებრივი თანასწორობის ცენტრი 2017 წლის თებერვალში ელენე კვერნაძემ დააარსა. ცენტრის მიზანი საქართველოში ოჯახური ძალადობის მსხვერპლთა პრაქტიკული და გრძელვადიანი იურიუდიული დახმარებაა. გარდა ამისა, მათი მიზანია, მსხვერპლთა რეაბილიტაციაში დახმარება და გენდერული უთანასწორობისა და დისკრიმინაციის აღმოფხვრა. ორგანიზაცია ამავე მიმართულებებზე განათლებისა და ცნობიერების ამაღლების კუთხითაც მუშაობს.