მოკლედ: რუსეთის უზენაესმა სასამართლომ, 30 ნოემბრის გადაწყვეტილებით, საერთაშორისო ლგბტქია+ უფლებადამცველი მოძრაობები "ექსტრემისტულ" ორგანიზაციებად ცნო.

რატომ არის ეს მნიშვნელოვანი: არსებითად, ამ გადაწყვეტილებით,

  • ქვეყანაში აიკრძალა ლგბტქია+ აქტივიზმი, რამდენადაც დადგენილება წარმოადგენს გეების, ლესბოსელებისა და ტრანსგენდერების უფლებების წინააღმდეგ მიმართულ ყველაზე მკვეთრ ნაბიჯს.
  • აქტივისტები ამბობენ, გადაწყვეტილება რუსეთის ხელისუფლებას საშუალებას მისცემს, განურჩევლად დასაჯოს ყველა, ვისაც უფლებადამცველ მოძრაობებთან დაკავშირებულად მიიჩნევს.
  • "ვფიქრობ, ეს ნიშნავს, რომ ნებისმიერ პირს, ვისაც სახელმწიფო ლგბტ აქტივისტად ჩათვლის, შეეძლება შეუფარდოს პატიმრობა ხანგრძლივი ვადით, "ექსტრემისტული" ორგანიზაციული საქმიანობისთვის, ან მონაწილეობისთვის. ეს ნამდვილი რეპრესიაა. რუსეთის ლგბტ თემში პანიკაა. ხალხი ცდილობს, ქვეყანა სწრაფად დატოვოს. ჩვენ გვიწევს ევაკუაცია საკუთარი ქვეყნიდან, რაც საშინელებაა", — ამბობს სერგეი ტროშინი, რომელიც ადგილობრივი დეპუტატია სანქტ-პეტერბურგში. მან ახლახან ღიად განაცხადა, რომ გეია.

დეტალები: სასამართლოს გადაწყვეტილება ეფუძნება იუსტიციის სამინისტროს მიერ შეტანილ სარჩელს, რომელიც მოითხოვდა, "საერთაშორისო ლგბტ საზოგადოებრივი მოძრაობის" ექსტრემისტულად გამოცხადებასა და საქმიანობის აკრძალვას.

სარჩელის მიხედვით, "გამოვლინდა ექსტრემისტული ორიენტაციის სხვადასხვა ნიშნები და გამოვლინებები, მათ შორის, სოციალური და რელიგიური სიძულვილის წახალისება."

  • ჯერჯერობით უცნობია, როგორ აპირებს რუსეთი განაჩენის აღსრულებას საერთაშორისო ორგანიზაციების მიმართ, თუმცა, ზოგადად, ქვეყანაში "ექსტრემისტულ ორგანიზაციებში" საქმიანობა უკვე დასჯადია და სისხლის სამართლის დანაშაულად ითვლება.

კონტექსტი: ეს ყველაფერი ლგბტქია+ ადამიანების წინააღმდეგ მიმართული იმ პოლიტიკის ნაწილია, რასაც ვლადიმერ პუტინი. "ტრადიციული ოჯახური ღირებულებების" დაცვის საბაბით, ათ წელზე მეტია მიმართავს.

  • ჯერ კიდევ 2013 წელს შევიდა ძალაში კანონი, რომელიც 18 წლამდე ასაკის ადამიანებში "ჰომოსექსუალობის აგიტაციას" კრძალავს.
  • რუსეთის მთავრობა აცხადებს, რომ აღნიშნული კანონით "მორალს" იცავს, თუმცა, 2017 წელს ევროსასამართლომ განაცხადა, რომ ეს კანონი აძლიერებს სტიგმას, წინასწარგანწყობასა და ახალისებს ჰომოფობიას.

  • რუსეთში ჰომოსექსუალობა 1993 წლიდან არის დეკრიმინალიზებული, თუმცა, კრემლის პოლიტიკის შედეგად, ქვეყანაში ანტი-ლგბტ განწყობები მაინც მაღალია.