ამერიკის პრეზიდენტის შვილი, დონალდ ტრამპ უმცროსი, აშშ-ს საპრეზიდენტო არჩევნებამდე კრემლთან დაახლოებულ რუს იურისტს შეხვდა, რომელმაც მას დემოკრატების საპრეზიდენტო კანდიდატის, ჰილარი კლინტონის, შესახებ ისეთი ინფორმაცია მიაწოდა, რომელიც მისი თქმით, მამამისს წინასაარჩევნო კამპანიის დროს, უნდა დახმარებოდა. ამის შესახებ დონალდ-ტრამპ უმცროსმა თავად განაცხადა. ინფორმაციას ABC ავრცელებს.

შეხვედრა 2016 წლის 9 ივნისს ტრამპ თაუერში შეხვდა და მას ივანკა ტრამპის ქმარი, ჯარედ კუშნერი და დონალდ ტრამპის საარჩევნო კამპანიის მდივანი, პოლ მენაფორტიც, ესწრებოდა.

პრეზიდენტის შვილის თქმით, იურისტმა მას უთხრა, რომ ჰილარის წინასაარჩევნო კამპანიას რუსეთთან დაკავშირებული პირები აფინანსებდნენ.

"თუმცა იურისტის განცხადება და მის მიერ მოწოდებული ინფორმაცია დიდად სარწმუნო არ იყო, რადგან მას დამადასტურებელი ცნობები არ წარმოუდგენია. მაშინვე მივხვდი, რომ მისი სიტყვები სერიოზული მნიშვნელობის მატარებელი არ იყო" - განაცხადა უცმროსმა ტრამპმა.

ტრამპის შვილის თქმით, ამის შემდეგ იურისტმა, სახელად ნატალია ვესელნიცსკაიამ, საუბრის თემა შეცვალა და მაგნეცკის აქტზე დაიწყო საუბარი. ამ აქტის მიხედვით, რუსეთის ოფიციალური პირების ნაწილს არ შეუძლიათ ამერიკაში შესვლა და ქვეყნის საბანკო სისტემის გამოყენება. კანონი ამერიკაში 2012 წელს მიიღეს, რის შემდეგაც, რუსეთმა ამერიკის მოქალაქეებს რუსი ბავშვების შვილად აყვანა აუკრძალა. ვესელნიცსკაია ამ აქტის წინააღმდეგ წლებია მუშაობს.

"ჩემთვის აშკარა გახდა, რა იყო მისი შეხვედრის მთავარი მიზეზი. მე მას საუბარი გავაწყვეტინე და ვუთხარი, რომ მამაჩემი ოფიციალურად არ იყო არჩეული ამერიკის პრეზიდენტად და მისი მოსაზრებები შესაძლოა მერე მოესმინა, როცა ის არჩევნებში გაიმარჯვებდა. შეხვედრა სულ 20-30 წუთი გაგრძელდა და ამის შესახებ მამაჩემმა არაფერი იცოდა. ამის შემდეგ, ამ იურისტთან კონტაქტი არ მქონია" - აცხადებს დონალდ ტრამპ უმცროსი.

დონალდ ტრამპ უმროსის ეს განცხადება პირველია, რომლითაც პრეზიდენტის ოჯახის წევრის მხრიდან დასტურდება აშშ-ს საპრეზიდენტო არჩევნებამდე რუსეთსა და ტრამპის ოჯახისა და კამპანიის წევრებს შორის კავშირი.

FBI აცხადებს, რომ რუსმა ჰაკერებმა კლინტონის კამპანიიდან ინფორმაცია მოიპარეს, რომელიც 2016 წლის 22 ივლისს ვიკილიქსზე გამოაქვეყნეს.