მოკლედ: საქართველოს გენერალური პროკურატურის მიხედვით, საქართველოდან აშშ-ში იმ პირის ექსტრადირება მოხდა, რომელიც 70 მილიონი დოლარის ოდენობის კრიპტოვალუტის მოტყუებით დაუფლების ფაქტზე იყო ბრალდებული.

დეტალები: ის იძებნებოდა ინტერპოლის არხებით და შსს-მ ბათუმში დააკავა.

  • მისი ექსტრადიცია საქართველოს სამართალდამცავ უწყებებსა და აშშ-ის იუსტიციის დეპარტამენტს შორის ტრანსნაციონალური ორგანიზებული დანაშაულის წინააღმდეგ ბრძოლაში თანამშრომლობის შედეგად მოხდა.
  • ძებნილი პირის საქართველოდან ამერიკის შეერთებულ შტატებში ტრანსპორტირება აშშ-ის მარშალთა სამსახურმა უზრუნველყო.

რა ვიცით საქმის შესახებ: პროკურატურის ცნობით,

  • ბრალდებული აშშ-ის სამართალდამცავი ორგანოების მიერ იძებნებოდა ტრანსნაციონალური ხასიათის, განსაკუთრებით დიდი ოდენობით თაღლითობისა და ფულის გათეთრების განსაკუთრებით მძიმე კატეგორიის დანაშაულებისთვის.
  • მან, სულ მცირე, 20 თაღლითური ონლაინ საინვესტიციო პლატფორმის შექმნა და მათი ფუნქციონირება უზრუნველყო.
  • თაღლითური ონლაინ საინვესტიციო პლატფორმების გამოყენებით, 6 წლის განმავლობაში, მთელი მსოფლიოს მასშტაბით ასეულობით დაზარალებულისგან მოტყუებით მიღებულმა თანხამ 70 მილიონ აშშ დოლარზე მეტი შეადგინა.

რას ამბობს აშშ-ის იუსტიციის დეპარტამენტი: ბრალდებულის ექსტრადიცია საერთაშორისო თანამშრომლობისა და გამოძიების ფედერალური ბიუროს მუშაობის შედეგად განხორციელდა, ამ პირის მართლმსაჯულების წინაშე წარდგენის მიზნით.