ათიათასობით ადამიანი, რომელიც რამდენიმე დღის წინ, სამართლიანობის მოთხოვნით, თურქეთის დედაქალაქ ანკარადან დაიძრა, სტამბოლშია. პრეზიდენტ რეჯეპ ტაიპ ერდოღანის მოწინააღმდეგეებმა მსვლელობა რამდენიმე დღის წინ ფეხით დაიწყეს და მასშტაბური აქციის ჩატარების მიზნით სტამბოლში ჩავიდნენ. ათიათასობით ადამიანმა 400-ზე მეტი კილომეტრი გადაიარა, ეს რამდენიმე მათგანისთვის ცუდად დასრულდა - ზოგის ჯანმრთელობის მდგომარეობა მკვეთრად გაუარესდა, ერთი პირი კი გარდაიცვალა.

მარში ოპოზიციონერი ლიდერის, ქემალ კილიჩადოღლუს მოწოდების შედეგად დაიწყო. აღნიშნულს წინ უძღოდა მისი თანაპარტიელის, ოპოზიციონერი პარლამენტარის დაკავება.

"თურქეთი არ არის დემოკრატიული სახელმწიფო, ის ერთი ადამიანის საკუთრება გახდა", - უთხრა კილიჩადოღლუმ CNN-ს.

თითქმის ერთი წელი გავიდა მას შემდეგ, რაც თურქეთში გადატრიალების მცდელობა იყო. აღნიშნული ფაქტი პრეზიდენტმა ერდოღანმა სამოქალაქო აქტივისტებზე, მედიაზე, მოსამართლეებზე, მასწავლებლებსა და ოპოზიციურად განწყობილი ათასობით ადამიანზე ზეწოლისთვის გამოიყენა. 2015 წლის ივლისის გადატრიალების მცდელობის შემდეგ, ერდოღანის ხელისუფლებამ სხვადასხვა პროფესიის ათასობით ადამიანი ციხეში ჩასვა, უფრო მეტი კი სამსახურიდან გაათავისუფლა. დაიხურა არაერთი მედიასაშუალება. მას შემდეგ ქვეყანაში საგანგებო მდგომარეობაა გამოცხადებული, რაც ხელისუფლებას დიდ ძალაუფლებასა და თავისუფლად მოქმედების საშუალებას ანიჭებს.

სხვა აქციებისგან განსხვავებით, "სამართლიანობის მარში" მშვიდობიანი იყო, პოლიცია, დარბევის ნაცვლად, უზრუნველყოფდა აქციის მონაწილეთა უსაფრთხოებას თუმცა, როგორც CNN აცხადებს, რთულია პროგნოზირება, ასევე მშვიდობიანად თუ დასრულდება აღნიშნული აქცია სტამბოლში. აქციის მონაწილეები მიიჩნევენ, რომ ერდოღანმა უღალატა რესპუბლიკის დამფუძნებლის, მუსტაფა ქემალ ათათურქის იდეებს.