რა ხდება: ღაზის სექტორში, საავადმყოფოებს მედიკამენტების და საწვავის მარაგები ეწურებათ.

  • ტერიტორიაზე ეგვიპტიდან შეზღუდული რაოდენობით შევიდა სატვირთო მანქანები, თუმცა, ჰუმანიტარული ტვირთი საწვავის შეტანას არ ითვალისწინებდა.

დეტალები: UNICEF-მა განაცხადა, რომ ინკუბატორში მოთავსებული 120 ბავშვის სიცოცხლე, რომელთაგან 70 ნაადრევად არის დაბადებული და ხელოვნური სუნთქვის აპარატზეა, დამოკიდებულია გენერატორზე, რადგან ღაზას ისრაელმა ელექტროენერგიის მიწოდება შეუწყვიტა.

  • რაფას სასაზღვრო გამშვებ პუნქტზე, რომელიც ღაზას ეგვიპტესთან აკავშირებს, მობილიზებული იყო საწვავით დატვირთული რამდენიმე მანქანა, თუმცა მათი ღაზაში შესვლა არავის დაუდასტურებია.
  • ისრაელმა, რამდენიმე დღის წინ, ჩრდილოეთ ღაზის მოსახლეობას ევაკუაციისკენ მოუწოდა, მაგრამ ჯანდაცვის მსოფლიო ორგანიზაციის წარმომადგენელი ტარიქ ჯაშარევიჩი ამბობს, რომ ეს შეუძლებელია და მოუწოდებს ისრაელს, გადახედოს საკუთარ ბრძანებას.
  • "არიან პაციენტები, რომლებსაც გადაადგილება არ შეუძლიათ, ბევრი მათგანი მართვით სუნთქვაზეა, ახალშობილები ინკუბატორებში არიან, ძალიან ძნელია მათი გადაადგილება," — განაცხადა მან BBC-სთან.
  • ჯაშარევიჩის თქმით, ეგვიპტიდან 4 სატვირთო მანქანით ოპერაციისთვის და ტრავმების სამკურნალოდ საჭირო მასალა შეიტანეს, რაც საკმარისი არ არის.
  • მისივე თქმით, საზღვარზე დგას კიდევ რამდენიმე მანქანა ასეთივე ჰუმანიტარული ტვირთით, რომლებიც, უსაფრთხოების გარანტიის არქონის გამო, ღაზის სექტორში ვერ შედიან.

ღაზის ჯანდაცვის სამინისტროს თქმით, კონფლიქტს, 7 ოქტომბრის შემდეგ, 4651 პალესტინელი ემსხვერპლა, მათგან 1873 ბავშვი, 1101 ქალი და 1677 კაცია.

დაშავდა 14 245 ადამიანი.