ფლორიდელი ლეონარდ ალან ქიური 16 წლის განმავლობაში იმ დანაშაულის გამო იყო დაპატიმრებული, რომელიც მას არ ჩაუდენია. რამდენიმე დღის წინ ჯორჯიის შტატში ლეონარდის მანქანა პოლიციამ გააჩერა, შემდეგ კი ის ოფიცრის ტყვიას ემსხვერპლა.

ჯორჯიის საგამოძიებო ბიუროს ინფორმაციით, გაჩერებისას პოლიციამ მანქანის მძღოლის ვინაობა არ იცოდა. ლეონარდი მანქანიდან გადმოვიდა და თავიდან ოფიცრის მოთხოვნები შეასრულა, თუმცა როცა გაიგო, რომ აპატიმრებდნენ, პოლიციას წინააღმდეგობა გაუწია.

"ქიური არ დაემორჩილა ოფიცერს, ამიტომ მან ელექტროშოკი გამოიყენა. ამის შემდეგ ქიური ოფიცერს თავს დაესხა, ამიტომ ოფიცერმა ჯერ ისევ ელექტროშოკი, შემდეგ კი ხელკეტი გამოიყენა. დაუმორჩილებლობის გამო, ოფიცერმა ბოლოს ცეცხლსასროლი იარაღი ამოიღო და დაკავებულს ესროლა", — ნათქვამია ჯორჯიის საგამოძიებო ბიუროს განცხადებაში.

ჯერჯერობით უცნობია, რატომ სთხოვა პოლიციამ ლეონარდს მანქანის გაჩერება. სროლის შემდეგ ადგილზე სასწრაფო დახმარება მივიდა, თუმცა ლეონარდის გადარჩენა ვერ შეძლეს და ის მალევე გარდაიცვალა.

ლეონარდს სამუდამო პატიმრობა შეიარაღებულ ძარცვაში მონაწილეობისთვის 2004 წელს მიუსაჯეს. რამდენიმე ალიბის მიუხედავად, ქიურის უდანაშაულობა მხოლოდ 2020 წელს დამტკიცდა. საგამოძიებო ჯგუფმა აღმოაჩინა მტკიცებულება ქვითრის სახით, რომელიც ადასტურებდა, რომ ქიური ძარცვის დროს დანაშაულის ადგილიდან კილომეტრებით იყო დაშორებული.