საქართველოს დემოკრატიული ინიციატივა საკონსტიტუციო სასამართლოსა და საკონსტიტუციო სამართალწარმოების შესახებ კანონებში ცვლილებების არაკონსტიტუციურად და ძალადაკარგულად გამოცხადებას ითხოვს. ორგანიზაცია განმარტავს, რომ ცვლილებები არღვევს ადამიანის უფლებებსა და თავისუფლებებს, არაკონსტიტუციურია და საფრთხეს უქმნის დროულ და ეფექტურ საკონსტიტუციო მართლმსაჯულების განხორციელებას:

"მათ შორის აღნიშნულ ნორმათა მნიშვნელოვან ნაწილზე სამწუხაროდ არაფერი თქმულა საქართველოს პრეზიდენტის ვეტოშიც".

GDI მიერ მოამზადებული კონსტიტუციური სარჩელით გასაჩივრებულია ის ნორმები, რომლებიც შეეხება:

  • თავმჯდომარის ან/და თავმჯდომარის მოადგილის ხელმეორედ არჩევის აკრძალვას.
  • 10 წლიანი უფლებამოსილების ვადის ავტომატური შეწყვეტას.
  • სადავო ნორმის შეჩერებასთან დაკავშირებით პლენუმის იურისდიქციას.
  • ნორმათა მხოლოდ განმწესრიგებელ სხდომაზე შეჩერების შესაძლებლობას.
  • ორგანული კანონით გათვალისწინებულ საკითხებთან დაკავშირებით პლენუმის იურისდიქციას.
  • საკონსტიტუციო სასამართლოს წევრის მიერ პლენუმისათვის საქმის გადაცემის არსებული მოდელს.
  • გადაწყვეტილების ძალაში შესვლისათვის საკონსტიტუციო სასამართლოს სრული ტექსტის გამოქვეყნების ვალდებულებას.
  • პლენუმის მიერ გადაწყვეტილების მიღებისათვის დადგენილი კვორუმს.
  • საკონსტიტუციო სასამართლოს თავმჯდომარის არჩევის ახალი წესის ამოქმედების გადავადებას.

"იმის გათვალისწინებით, რომ სადავო ნორმათა ნაწილი წინააღმდეგობაშია არამხოლოდ კონსტიტუციის მე-2 თავით დაცულ ადამიანის უფლებებთან და თავისუფლებებთან, არამედ კონსტიტუციის სხვა მუხლებთანაც, საქმის განხილვაში მოსარჩელე მხარეა საქართველოს პარლამენტის წევრთა 1/5, ხოლო საქართველოს დემოკრატიული ინიციატივა გამოიყენებს მათ მიერ რწმუნებულებით დელეგირებულ უფლებამოსილებას და თავად წარმოადგენს მხარეს სასამართლოში".

4 ივნისს საქართველოს პარლამენტმა საკონსტიტუციო სასამართლოს შესახებ კანონპროექტთან დაკავშირებით პრეზიდენტის ვეტოში ასახული შენიშვნები გაიზიარა და კანონი მათი გათვალისწინებით, 84 ხმით მიიღო.