საპარლამენტო უმცირესობა განმარტავს, რომ ვინაიდან გასულ კვირას საპარლამენტო უმრავლესობა პრეზიდენტის მიერ საკონსტიტუციო სასამართლოს შესახებ კანონზე დადებულ ვეტოს დაძლევდა, ამ კვირაში კი მათ ეს გადაწყვეტილება შეცვალეს, აღნიშნული იწვევს ეჭვს, ხომ არ გაურიგდნენ პრეზიდენტი, უმრავლესობა და პრემიერი ერთმანეთს.

"სამწუხაროა, რომ ეს არის ვეტო ვეტოსთვის. პრეზიდენტის, მთავრობის და ბიძინა ივანიშვილის ინტერესები, სამწუხაროდ, დაემთხვა ერთმანეთს" - ასე აფასებს ერთიანი ნაციონალური მოძრაობის წევრი, სერგო რატიანი პრეზიდენტის ვეტოს და განმარტავს, რომ მარგველაშვილმა ვენეციის კომისიის დასკვნა სრულად არ გაითვალისწინა.

თავისუფალი დემოკრატების წევრი, ირაკლი ჩიქოვანიც განმარტავს, რომ შესაძლოა მართლაც არსებობდეს რაიმე სახის მოლაპარაკებები, თუმცა საზოგადოება ამ მოლაპარაკებების პირობების საქმის კურსში არ არის:

"ვენეციის კომისია პირდაპირ ჩაერია და ძალიან სწრაფად მოამზადეს დასკვნა, რამაც ცხადყო, რომ უმრავლესობისათვის ეს სერიოზული საერთაშორისო ზიანის მომტანი იქნება. აქვე ვიტყვი, რომ პრეზიდენტის პოზიცია, რომ ის მზად იყო ვეტო დაედო და გაეზიარებინა საერთაშორისო ორგანიზაციების პოზიციები, ესეც შეიცვალა".

საკონსტიტუციო სასამართლოს შესახებ კანონში ცვლილებები პარლამენტმა 14 მაისს მიიღო. შემდეგ ის პრეზიდენტს, პრეზიდენტმა კი დასკვნისთვის ვენეციის კომისიას გადაუგზავნა. ვენეციის კომისიის კრიტიკული დასკვნის მიღების შემდეგ გუშინ, 31 მაისს, გიორგი მარგველაშვილმა აღნიშნულ კანონს ვეტო დაადო.

ცნობილია, რომ მარგველაშვილის ვეტოს წინ უძღოდა კონსულტაციები, რომელშიც თავად პრეზიდენტი, პრემიერმინისტრი და საპარლამენტო უმრავლესობა იღებდა მონაწილეობას.