"სიტყვასიტყვით ის, რაც წერია ვენეციის კომისიის დასკვნაში, გათვალისწინებულია ჩვენს ვეტოში" - ასე უპასუხა გიორგი მარგველაშვილმა დღეს გაკეთებულ განცხადებებს იმასთან დაკავშირებით, რომ პრეზიდენტმა საკონსტიტუციო სასამართლოს შესახებ კანონთან დაკავშირებული შენიშვნების შემუშავებისას ვენეციის კომისიის დასკვნის მხოლოდ ნაწილი გაიზიარა.

მისი თქმით, უმრავლესობასთან გამართული მოლაპარაკებების ფარგლებში ამოსავალი წერტილი სწორედ ვენეციის კომისიის დოკუმენტი იყო:

"ეს იყო ის დოკუმენტი, რომლის ირგვლივაც ჩვენ ვსაუბრობდით. გასაგებია, რომ შეიძლება რომელიღაც ექსპერტების და ვენეციის კომისიის სურვილები ზოგიერთ შემთხვევაში არ ემთხვეოდეს ერთმანეთს, მაგრამ ჩვენთვის ამოსავალი იყო ვენეციის კომისიის დოკუმენტი".

მას შემდეგ რაც პრეზიდენტმა საკონსტიტუციო სასამართლოს შესახებ კანონს ვეტო დაადო, სამოქალაქო სექტორმა განაცხადა, რომ პრეზიდენტმა აღნიშნულ კანონთან დაკავშირებული ცვლილებების შემუშავებისას ვენეციის კომისიის დოკუმენტი სრულად არ გაითვალისწინა.

საკონსტიტუციო სასამართლოს შესახებ კანონში ცვლილებები პარლამენტმა 14 მაისს მიიღო. შემდეგ ის პრეზიდენტს, პრეზიდენტმა კი დასკვნისთვის ვენეციის კომისიას გადაუგზავნა. ვენეციის კომისიის კრიტიკული დასკვნის მიღების შემდეგ გუშინ, 31 მაისს, გიორგი მარგველაშვილმა აღნიშნულ კანონს ვეტო დაადო.

ცნობილია, რომ მარგველაშვილის ვეტოს წინ უძღოდა კონსულტაციები, რომელშიც თავად პრეზიდენტი, პრემიერმინისტრი და საპარლამენტო უმრავლესობა იღებდა მონაწილეობას