აშშ-ში, ქალაქ სიეტლში მდებარე პოპკულტურის მუზეუმმა თავისი საგამოფენო სივრცის იმ ნაწილიდან, რომელიც ჰარი პოტერის სამყაროს ეთმობა, ამ სამყაროს შემქმნელის, ჯოან როულინგის, კვალი გააქრო. მანამდე მუზეუმმა ვებგვერდზე ბლოგი გამოაქვეყნა სათაურით ის, ვისი სახელიც არ ითქმის და თავისი გადაწყვეტილების მოტივი ახსნა.

"ჰარი პოტერის სამყაროში ერთი ცივი, უსულგულო და სიხარულის მწოველი არსებაა და ამჯერად ეს დემენტორი ნამდვილად არ გახლავთ", — ვკითხულობთ ბლოგში, — "გვსურს, იმ ინტერნეტ-თეორიას მივყვეთ, რომ ეს წიგნები ავტორის გარეშე დაიწერა, რადგან ეს კონკრეტული პიროვნება თავის სიძულვილით სავსე, განხეთქილების გამომწვევ შეხედულებებს მეტისმეტად ხმამაღლა გამოხატავს იმისათვის, რომ ყურადღება არ მივაქციოთ. დიახ, ჯოან როულინგზე ვსაუბრობთ და არა, არ მოგვწონს, რომ მას ყურადღებას ვუთმობთ, ასე რომ, ამ ტექსტში მის სახელს ბოლოჯერ ხედავთ. უბრალოდ, მოვიხსენიებთ, როგორც 'ის, ვისი სახელიც არ ითქმის', რადგან ამ პერსონაჟს ძალიან ჰგავს [მინიშნება პოტერიადის მთავარ ბოროტმოქმედზე, ლორდ ვოლდემორზე]".

"ამ ეტაპისთვის, კურატორებმა გადაწყვიტეს, საგამოფენო სივრციდან მისი კვალი წაეშალათ გავლენის შესასუსტებლად. იდეალური გადაწყვეტილება არაა, მაგრამ მოკლევადიან პერსპექტივაში, სანამ სამომავლო გეგმას დავსახავთ, მხოლოდ ეს შეგვიძლია".

ბრიტანული მედიის ცნობით, მუზეუმში ჰარი პოტერისადმი მიძღვნილი სექცია მაინც დარჩა, თუმცა, ფრენჩაიზის შემქმნელი არსადაა ნახსენები.

რა ხდება როულინგის თავს

ფოტო: Getty Images

იმის მიუხედავად, რომ ჰარი პოტერი წლების შემდეგაც რჩება ფანების საყვარელ ისტორიად, ბოლო წლებში საგის ავტორი, ჯოან როულინგი, კრიტიკის სამიზნეში არაერთხელ მოხვდა. მიზეზად დიდწილად მისი შეხედულებები იქცა — მწერალი ბევრჯერ დაადანაშაულეს ტრანსფობიაში.

თავდაპირველად, ამის საფუძველი მკვლევარ მაია ფორსტეიტერის დაცვა გახდა. ეს უკანასკნელი სამსახურიდან ტრანსფობიური განცხადების — "კაცებს ქალად გახდომა არ შეუძლიათ" — გამო დაითხოვეს. მოგვიანებით, როულინგმა ტვიტერზე დაწერა, რომ "ადამიანებისთვის, რომელთაც მენსტრუაცია აქვთ, შესაფერისი სიტყვა უკვე არსებობს". შემდეგ, მწერალი თავის დეტექტიურ რომანში ბოროტმოქმედად "ქალად გადაცმული კაცის" გამოყვანისთვის გააკრიტიკეს.

კრიტიკამ კი სხვადასხვაგვარი ფორმა მიიღო — ტიკტოკის მომხმარებლები ჰარი პოტერის წიგნებსაც კი წვავდნენ. 2021 წელს როულინგმა ტვიტერზე ასევე დაწერა, რომ თავისი სახლის მისამართი "სამმა აქტივისტმა" გაასაჯაროვა. ეს ფაქტი სოციალური ქსელის ადმინისტრაციამ და შოტლანდიის პოლიციამ აღკვეთეს, თუმცა, მწერლის თქმით, მან სიკვდილის მუქარებიც კი მიიღო.

ავტორისადმი "მიმართული სიძულვილის ტალღა" არაერთმა ცნობილმა ადამიანმა, მათ შორის, ჯადოსნური არსებების მსახიობმა ედი რედმეინმა დაგმო.

2021 წელს როულინგმა ტვიტერზე სტატიაა გააზიარა, სადაც ნათქვამი იყო, რომ "პოლიცია კაცის გენიტალიების მქონე გამაუპატიურებელს ქალად აღნიშნავს, თუკი თავდამსხმელი საკუთარ თავს ქალად აიდენტიფიცირებს".

"ომი მშვიდობაა. თავისუფლება ტყვეობაა. უგუნურება ძალაა. პენისიანი ინდივიდი, რომელმაც გაგაუპატიურა, ქალია", — დაწერა მწერალმა პოსტის აღწერაში.

მწერალთან გასამიჯნად ქვიდიჩის მსოფლიო ასოციაციებმაც გადაწყვიტეს სახელის შეცვლა. ავტორი გასულ წელს ანტისემიტიზმშიც დაადანაშაულეს.

2022 წლის აგვისტოში, როცა მწერალ სალმან რუშდის აშშ-ში თავს დაესხნენ და ფიზიკურად გაუსწორდნენ, მოკვლით დაემუქრნენ ჯოან როულინგსაც.

ამ ყველაფრის მიუხედავად, აპრილის თვეში, როცა ჰარი პოტერის სერიალი დაანონსდა, გავიგეთ, რომ პროექტის აღმასრულებელი პროდიუსერი თავად როულინგი იქნება.

ნახეთ ჩვენი ყველა მასალა ჰარი პოტერზე.