თალიბანმა ავღანეთის დასავლეთით მდებარე პროვინცია ჰერათში მუსიკალური ინსტრუმენტები დაწვა. მომხდარის შესახებ სამთავრობო მედია Bakhtar იუწყება.

ზნეობის პოპულარიზაციისა და მანკიერების პრევენციის სამინისტროს წარმომადგენელი ჰერათის რეგიონში, შეიხ აზიზ ალ-რაჰმან ალ-მუჰაჯირი, ამბობს, რომ მუსიკა "ახალგაზრდობას გზიდან აცდენს და საზოგადოებას ღუპავს". იგი მუსიკას მიაწერს ადამიანების გარყვნასაც.

ინფორმაციასთან ერთად, ინტერნეტში გავრცელდა მუსიკალური ინსტრუმენტების დაწვის ამსახველი ფოტომასალაც.

ფოტო: Afghanistan's Ministry for the Propagation of Virtue and the Prevention of Vice / AFP

აღსანიშნავია, რომ თალიბანმა არარელიგიური მუსიკა წინათაც აკრძალა, როცა 1990-იან წლებში ქვეყანას მართავდა.

ამის მიუხედავად, ავღანეთს მრავალსაუკუნოვანი მუსიკალური ტრადიცია აქვს, როგორც ტრადიციული, ასევე თანამედროვე მიმართულებებით. თუმცა, მას შემდეგ, რაც 2021 წელს თალიბანმა ძალაუფლება ისევ იგდო ხელთ, მუსიკის ეროვნულ ინსტიტუტში არც მასწავლებლები და არც სტუდენტები აღარ დაბრუნებულან. არაერთმა მუსიკოსმა ქვეყანაც დატოვა.

თალიბანის ძალაუფლებამ კი ავღანეთში მხოლოდ მუსიკოსების ყოველდღიურობა როდი შეცვალა. ნაციონალისტურ-ფუნდამენტალისტურმა მოძრაობამ, რომელსაც არაერთი ქვეყანა ტერორისტულ დაჯგუფებად თვლის, 2021 წლიდან დღემდე არაერთი დისკრიმინაციული ზომა მიიღო, დიდწილად, ქალების წინააღმდეგ. გასულ წელს მათ ავღანელ ტელეწამყვან ქალებს სახის გამოჩენა აუკრძალეს, მოგვიანებით შეუზღუდეს უმაღლეს სასწავლებლებში სწავლისა და არასამთავრობო ორგანიზაციებში მუშაობის უფლებაც. ამასთან, ავღანელ ქალებს მხოლოდ კონკრეტულ დღეებში აქვთ საჯარო სკვერების მონახულების უფლება, ხოლო გრძელ გზაზე "მეურვე კაცის" გარეშე გადაადგილება საერთოდ ეკრძალებათ. რამდენიმე კვირის წინ თალიბანის ბრძანებით ქვეყანაში სილამაზის სალონებიც დაიხურა.

ასევე იხილეთ: