ბარბის რეჟისორმა გრეტა გერვიგმა განაცხადა, რომ უნდოდა, ფილმში ტომითი შალამესა და სირშა რონანსაც ეთამაშათ. გერვიგს მსახიობებთან წარსულში მის ორ წარმატებულ ფილმზე Lady Bird-სა და Little Women-ზე უმუშავია.

ცოტა ხნის წინ, რეჟისორმა CinemaBlend-თან ინტერვიუში განაცხადა, რომ შალამესა და რონანისთვის უკვე როლებიც კი ჰქონდა შერჩეული, თუმცა გრაფიკთან დაკავშირებული პრობლემების გამო მსახიობებმა ფილში მონაწილეობა ვერ შეძლეს.

"ორივე ძალიან მიყვარს. მათ გარეშე ფილმის გადაღება ისეთი შეგრძნება იყო, თითქოს შვილების გარეშე ვაკეთებდი რამეს. ვიცი, რომ მათი დედა არ ვარ, მაგრამ თავს ზოგჯერ ასე ვგრძნობ", — აღნიშნავს გერვიგი.

ამაზე წარსულში მიცემულ ინტერვიუში სირშამაც ისაუბრა და თქვა, რომ რადგან თავად ლონდონში ცხოვრობს და ბარბის გადაღებებიც იქ იყო, ეგონა, რომ ფილმში მონაწილეობას შეძლებდა. თუმცა, საბოლოოდ, იმის გამო, რომ ამ პერიოდში The Outrun-ზე მუშაობა შოტლანდიაში მოუწია, გერვიგის შემოთავაზებაზე უარი თქვა.

"უკვე მოფიქრებული იყო პერსონაჟი, რომელსაც ვითამაშებდი — ის კიდევ ერთი ბარბი უნდა ყოფილიყო. ძალიან დამწყდა გული იმის გამო, რომ თამაში ვეღარ შევძელი, მარგოს და გრეტას მივწერე კიდეც, იქნებ, რომელიმე სცენაში უბრალოდ ფონზე მაინც გავიარო-მეთქი", — ამბობს სირშა.

ბარბის პრემიერამდე სულ ცოტა დროღა რჩება. ცოტა ხნის წინ გართობის ინდუსტრიაში მომუშავე ჟურნალისტები ფილმის შესაფასებლად კინოჩვენებას დაესწრნენ. გრეტა გერვიგის ფილმში მთავარ როლებს მარგო რობი და რაიან გოსლინგი ასრულებენ. ფილმს ჟურნალისტებისგან ძალიან დადებითი გამოხმაურება მოჰყვა — მათ ბარბის რეჟისურა, მსახიობების შესრულება, კოსტიუმები და საცეკვაო ნომრებიც კი შეაქეს.

შეფასებებითაც ჩანს, რომ გრეტა გერვიგის ბარბი საოცარ თავგადასავალს გვპირდება! მას წლის კინომოვლენის სტატუსს უწინასწარმეტყველებენ. ფილმის პრემიერა 21 ივლისსაა დაგეგმილი. სიუჟეტის შესახებ ჯერჯერობით ის ვიცით, რომ ბარბი და კენი ზღაპრული სამყაროდან რეალობაში ინაცვლებენ, საინტერესო ამბები კი სწორედ აქ იწყება!

იხილეთ ასევე:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...