ბარბის პრემიერამდე სულ ცოტა დროღა რჩება! ცოტა ხნის წინ გართობის ინდუსტრიაში მომუშავე ჟურნალისტები ფილმის შესაფასებლად კინოჩვენებას დაესწრნენ. გრეტა გერვიგის ფილმში მთავარ როლებს მარგო რობი და რაიან გოსლინგი ასრულებენ.

ფილმს ჟურნალისტებისგან ძალიან დადებითი გამოხმაურება მოჰყვა — მათ ბარბის რეჟისურა, მსახიობების შესრულება, კოსტიუმები და საცეკვაო ნომრებიც კი შეაქეს. მაგალითად, კინობლოგერი ჯეიმი ჯირაკის თქმით, ბარბი მისი წლის საყვარელი ფილმია და თქვა, რომ გერვიგმა მოლოდინებს გადააჭარბა. მან ისიც დაამატა, რომ კენის როლისთვის გოსლინგს ოსკარი ეკუთვნის. Variety-ის სოციალური მედიის რედაქტორმა ქეთსი სტეფანმა კი ფილმს სრულყოფილება უწოდა.

რა თქმა უნდა, ფილმს კრიტიკაც მოჰყვა. Collider-ის ჟურნალისტი პერი ნემიროვის თქმით, ფილმზე მომუშავე გუნდმა ბარბის სამყაროს გაცოცხლება შეძლო, თუმცა ისიც დაამატა, რომ სიუჟეტში რამდენიმე პერსონაჟის ხაზის განვითარება დააკლდა.

"ბარბი ვნახე. ფილმის შემქმნელების ოსტატობა გასაოცარია — კოსტიუმებისა და გადასაღები მოედნის დიზაინი შემდეგ საფეხურზეა აყვანილი, რაც გიქმნის განცდას, რომ ნამდვილ ბარბის სამყაროში მოგზაურობ, რეალური ბარბებითა და საოცნებო სახლებით, მათი სამყარო შენ თვალწინ ცოცხლდება.

უშუალოდ სიუჟეტს რაც შეეხება, აქ ცოტა დაბნეული ვარ — თავად მარგო რობის პერსონაჟის ისტორია ძალიან კარგადაა ნაჩვენები, თუმცა რამდენიმე სხვა მნიშვნელოვანი გმირის ხაზს საკმარისი დრო არ დაეთმო, რომ მათი განვითარება გვენახა და უფრო მეტი გაგვეგო", — წერს ის.

Pay Or Wait-ის წამყვანმა, შერონდა უილიამსმა მარგოსა და გოსლინგის შესრულება დადებითად შეაფასეს, მაგრამ ისიც აღნიშნა, რომ ზოგიერთ მომენტში სცენარი გაწელილი მოეჩვენა.

შეფასებებითაც ჩანს, რომ გრეტა გერვიგის ბარბი საოცარ თავგადასავალს გვპირდება! მას წლის კინომოვლენის სტატუსს უწინასწარმეტყველებენ. ფილმის პრემიერა 21 ივლისსაა დაგეგმილი. სიუჟეტის შესახებ ჯერჯერობით ის ვიცით, რომ ბარბი და კენი ზღაპრული სამყაროდან რეალობაში ინაცვლებენ, საინტერესო ამბები კი სწორედ აქ იწყება!

იხილეთ ასევე:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...