რა მოხდა: 27 ივნისს ლაზარე გრიგორიადისის მამა, ბექა გრიგორიადისი ფეისბუქ LIVE-ში გაჟღერებული ფრაზების გამო წვრილმან ხულიგნობაში სამართალდამრღვევად ცნეს და 800 ლარით დააჯარიმეს.

  • როგორც გრიგორიადისის ადვოკატი, ნესტან ლონდარიძე მედიასთან ჰყვება, შსს მის დაცვის ქვეშ მყოფს ადმინისტრაციულ სამართალდარღვევათა კოდექსის 173-ე და 166 მუხლებით ედავებოდა.
  • სამართალდამცავი უწყების მტკიცებით, 3 ივნისს, ფეისბუქზე გრიგორიადისმა პოლიციელებს სიტყვიერი შეურაცხყოფა მიაყენა.
  • "ის, რაც იყო გამოქვეყნებული ამ დღეს, სრულიად ექცევა სიტყვისა და გამოხატვის თავისუფლების ფარგლებში. პიროვნებას უფლება აქვს, შეაფასოს მის მიმართ მიმდინარე სასამართლო პროცესები და ეს ღიად და საჯაროდ დააფიქსიროს", — ამბობდა ადვოკატი მედიასთან.

რატომ არის მნიშვნელოვანი: ეს პირველი შემთხვევა არაა, როცა მოქალაქეს სოციალურ ქსელში გაკეთებული განცხადების გამო აჯარიმებენ.

  • რამდენიმე დღის წინ ცნობილი გახდა, რომ პირი Tik-Tok-ზე სატრანსპორტო პოლიტიკის გაკრიტიკების გამო სამართალდამღვევად ცნეს და 2 000 ლარით დააჯარიმეს.
  • საიას ცნობით, ვიდეოს ავტორი თბილისის სატრანსპორტო პოლიტიკის გამო მწვავე პროტესტს გამოხატავდა — აკრიტიკებდა იმ ადამიანებს, რომლებიც სამსახურებრივ უფლებამოსილებას ბოროტად იყენებენ და პრივილეგირებული მდგომარეობით სარგებლობენ.
  • ასევე, ლანძღავდა იმ პოლიციელებს, რომლებიც შერჩევითად აჯარიმებენ მოქალაქეებს, ხოლო სახელმწიფო უწყებების თანამშრომლებსა და მათთან დაახლოებულ პირებს დარღვევაზე პასუხს არ სთხოვენ.

DRI-ის შეფასებით, გამოხატვის თავისუფლების ამ მასშტაბით შეზღუდვა, რასაც თან ახლავს დაკავება და დიდი ოდენობით ფულადი ჯარიმა, აუცილებლად გახდება კრიტიკული აზრის რეპრესირების ინსტრუმენტი.

  • ორგანიზაციაში ამბობენ, რომ სოციალურ ქსელში გამოთქმული მოსაზრების გამო სამართალწარმოების დაწყება და სასამართლოს მხრიდან შსს-ის მოსაზრების გაზიარება განსხვავებული აზრის დევნის საგანგაშო მაგალითია.
  • "გრიგორიადისის საქმეზე გამოტანილი გადაწყვეტილების მსგავსი სასამართლო პრაქტიკის ჩამოყალიბებით შეუძლებელი გახდება გამოხატვის თავისუფლების მაღალი ხარისხის სტანდარტით დაცვა", — ნათქვამია განცხადებაში.