ევროპასთან ინტეგრაციის კომიტეტის თავმჯდომარემ თამარ ხულორდავამ პარლამენტის პლენარულ სხდომაზე თქვა, რომ სულ უფრო ხელშესახები ხდება ევროკავშირთან ღრმა და ყოვლისმომცველი ვაჭრობის შეთანხმებით მიღწეული სარგებელი. კერძოდ, მისი ინფორმაციით, შარშანდელთან შედარებით 40 პროცენტითაა გაზრდილი ექსპორტი ევროკავშირის ტერიტორიაზე: "შავი ზღვის თევზი იმ პროდუქტების ჩამონათვალში შევიდა, რომელიც საქართველოდან შევა ევროკავშირში".

ასოცირების შეთანხმების ხელმოწერიდან სამი წელი გავიდა. დეპუტატის განცხადებით, შეთანხმების ფარგლებში მნიშვნელოვანი ნაბიჯები გადაიდგა, კერძოდ, არასრულწლოვანთა მართლმსაჯულების, მიგრაციის მართვის, თავშესაფრის სისტემის სამართლებრივი ჩარჩოს განვითარების, ენერგეტიკის, საჯარო სამსახურის რეფორმის, სოფლის მეურნეობის და ვაჭრობის მიმართულებით:

"ჩვენ შევუერთდით ენერგეტიკულ გაერთიანებას და პარლამენტმა მოახდინა ამ შეთანხმების რატიფიცირება. ესაა წინაპირობა იმისთვის რომ ჩვენი ენერგეტიკული სექტორი იყოს რეგიონში ბაზართან სრულად ინტეგრირებული. იყოს კონკურენტული, მოვიზიდოთ ახალი ინვესტიციები, შევქმნათ სამუშაო ადგილები. ამას გარდა მინდა გაზი გავუსვა მნშვნელოვან სიახლეს რომელიც პირველი ივლისიდან შემოდის, ესაა საჯარო სამსახურის შესახებ კანონი. მნშვნელოვანი ნაბიჯები იდგმება გარემოს გაუმჯობესების მიმართულებით. მიღებულია გარემოს დაცვის კოდექსი".

ხულორდავამ დღევანდელ სხდომაზე განაცხადა, რომ ბოლო სამ თვეში, 37 600-ზე მეტმა პირმა ისარგებლა ევროკავშირთან უვიზო რეჟიმით და აქედან მხოლოდ 0,3 პროცენტი (113 პირი) არ შეუშვეს საზღვარზე.