რატომ არის მნიშვნელოვანი: საერთაშორისო გამჭვირვალობა — საქართველომ სახელმწიფო ელექტროსისტემაში სავარაუდო ნეპოტიზმისა და ფავორიტიზმის შემთხვევები გამოააშკარავა.

• კვლევის თანახმად, სისტემაში ერთ-ერთი დირექტორის თანამდებობას ქართული ოცნების ყოფილი დეპუტატი, ვანო ზარდიაშვილი იკავებს, მის დაქვემდებარებაში არსებულ ორ დეპარტამენტში კი დასაქმებულია ხელისუფლებასთან და სასამართლო კლანის წევრებთან დაკავშირებული 6 ადამიანი.
• "ნეპოტიზმისა და ფავორიტიზმის შემთხვევების გაანალიზებით ნათელია, რომ ზარდიაშვილი დღემდე ინარჩუნებს მჭიდრო კავშირებს სასამართლოს გავლენიან მოსამართლეებთან და ხელისუფლებასთან. სამწუხაროდ, ნეპოტიზმი რჩება შემაშფოთებელ პრაქტიკად, რომელიც ძირს უთხრის მერიტოკრატიას, სამართლიანობასა და საზოგადოების ნდობას საჯარო უწყებების მიმართ", — აცხადებენ ორგანიზაციაში.

ზარდიაშვილთან დაკავშირებული სავარაუდო ნეპოტიზმი: ქართული ოცნების ყოფილი დეპუტატი საქართველოს სახელმწიფო ელექტროსისტემის დირექტორთა საბჭოს წევრი და დირექტორია იურიდიულ, გარემოს დაცვის, სოციალურ და ნებართვების საკითხებში.

• გამჭვირვალობა — საქართველოს ინფორმაციით, მის ქვემდებარე დეპარტამენტში მუშაობს ზარდიაშვილის რძალი, თამთა თაბუკაშვილი.
• იგი ზარდიაშვილის ცოლის, თინათინ აბრალავას, ძმის, გრიგოლ აბრალავას, ცოლია.

• სახელმწიფო ელექტროსისტემაში დირექტორის მოადგილეა ქართული ოცნების ყოფილი დეპუტატის ოჯახის ახლობელი და ნათესავი, გიორგი კიკნაძე — ვანო ზარდიაშვილი კიკნაძის შვილის ნათლიაა.

• ელექტროსისტემაში გარემოს დაცვის, სოციალური საკითხებისა და ნებართვების დეპარტამენტშია დასაქმებული, გიორგი კვარაია, ზარდიაშვილის ოჯახის ახლობელი და ნათესავი.

• კვლევის თანახმად, ამავე დეპარტამენტში საერთაშორისო პროექტების კოორდინატორია სააპელაციო სასამართლოს მოსამართლისა და ადმინისტრაციულ საქმეთა პალატის თავმჯდომარის, დიმიტრი გვრიტიშვილის ცოლი, სალომე დათუაშვილი-გვრიტიშვილი.
• ელექტროსისტემაში მუშაობს გავლენიანი მოსამართლის, უზენაესი სასამართლოს მოსამართლისა და საქართველოს უზენაესი სასამართლოს თავმჯდომარის მოადგილის, გიორგი მიქაუტაძის ბიძაშვილი, ნიკა მიქაუტაძე — მისი ბიძა და ვანო ზარდიაშვილი კურსელები და ახლო მეგობრები არიან.

• პარლამენტის წევრის, იურიდიულ საკითხთა კომიტეტის თავმჯდომარის, ანრი ოხანაშვილის მამა, გელა ოხანაშვილი, ასევე, ელექტროსისტემაშია დასაქმებული.

ზარდიაშვილის კავშირი "ოცნებასთან" და "კლანთან": TI-ის თანახმად, ვანო ზარდიაშვილი წლების განმავლობაში იუსტიციის უმაღლეს საბჭოს გავლენიან მოსამართლეებსა და ხელისუფლებას შორის საკონტაქტო პირად მიიჩნეოდა.

• იგი ყველაზე გავლენიანი მოსამართლის, მიხეილ ჩინჩალაძის ახლო მეგობარია.
• ზარდიაშვილი და მიხეილ ჩინჩალაძე მეჯვარეები და ნათელ-მირონები არიან.
• "2016 წელს ვანო ზარდიაშვილი ქართული ოცნების სიით პარლამენტში შევიდა და იურიდიულ საკითხთა კომიტეტის თავმჯდომარის პირველი მოადგილის თანამდებობა დაიკავა. ამის შემდეგ ის აქტიურად ლობირებდა ისეთ საკანონმდებლო ინიციატივებს, რომელთაც კლანის ძალაუფლების მნიშვნელოვანი ზრდა განაპირობეს", — ვკითხულობთ კვლევაში.
• აქვე ნათქვამია, რომ 2018 წელს ზარდიაშვილი აქტიურად ლობირებდა საბჭოს მიერ, პროცედურების არარსებობის პირობებში ნომინირებული უზენაესი სასამართლოს მოსამართლეობის კანდიდატების 10-კაციანი სიის პარლამენტში გატანას.
• "2021 წლის სექტემბერში, TV პირველის ეთერში გავიდა სიუჟეტი, რომლის თანახმადაც არსებობს სავარაუდოდ, სუს-იდან გაჟონილი ფარული ჩანაწერები, სადაც ჩანს, რომ ქართული ოცნების დეპუტატები მათთვის სასარგებლო სასამართლო გადაწყვეტილებებს ტელეფონით უკვეთენ. როგორც სიუჟეტიდან ირკვევა, "ოცნების" დეპუტატები, ამჟამად უკვე ყოფილი დეპუტატის, ვანო ზარდიაშვილის, დახმარებით ახდენენ გავლენას სასამართლოს საბოლოო გადაწყვეტილებებზე. ამ პროცესში, სავარაუდოდ, საკმაოდ დიდი გავლენა აქვს დეპუტატ მამუკა მდინარაძესაც, რომელიც თავის მხრივ, ვანო ზარდიაშვილის ნათესავია", — აცხადებენ TI-ში.

ზარდიაშვილის ქონება: გამჭვირვალობა — საქართველოს თანახმად, 2013-2019 წლებში ვანო ზარდიაშვილის ქონება მნიშვნელოვნად გაიზარდა.

• ამ პერიოდში ზარდიაშვილმა, დაახლოებით, 1 000 000 ლარის ღირებულების ქონება შეიძინა, მაშინ, როდესაც მისი და მისი მეუღლის წლიური შემოსავალი, ჯამში, დაახლოებით, 100 000 ლარი იყო.
• "2013 წელს, როცა ვანო ზარდიაშვილი გენერალური აუდიტორის პირველი მოადგილე იყო, საკუთრებაში 2 ბინა ჰქონდა თბილისში, უკვე 2015 წელს, მის დეკლარაციაში 6 ბინაა ასახული; უნდა აღინიშნოს, რომ ზარდიაშვილის მეუღლე, თინათინ აბრალავა 2014 წლიდან ფლობს 5% წილს შპს პენტჰაუზში, თუმცა აღნიშნულის შესახებ ინფორმაცია ზარდიაშვილმა მხოლოდ 2020 წლის დეკლარაციაში მიუთითა. პენტჰაუზის საკუთრებაში ირიცხება ქ. თბილისში, ჟიული შარტავას ქუჩის №43-ში, ოლიმპიური ვარსკვლავის საცხოვრებელი კომპლექსში არაერთი უძრავი ქონება", — ნათქვამია კვლევაში.
• TI-ის თანახმად, უკვე 2017 წელს პარლამენტარ ზარდიაშვილსა და მის მეუღლეს 8 ბინა და 1 კომერციული ფართი ჰქონდათ საკუთრებაში.
• "2021 წლის ოქტომბერში, მედიაში გავრცელებული ინფორმაციის თანახმად, ვანო ზარდიაშვილმა, 2019 წელს პარლამენტის დატოვებამდე რამდენიმე თვით ადრე, თბილისში არტ ჰაუს პლაზას ცათამბჯენში ბინა შეიძინა, რომლის საბაზრო ფასიც 1 მილიონ 175 ათასი ლარია".

განახლება: 20 ივნისს ზარდიაშვილმა ჟურნალისტებთან კვლევაზე ისაუბრა და ბრალდებები უარყო.

• როგორც ის ამბობს, გელა ოხანაშვილი არის ადამიანი, რომელიც წარმოუდგენლად რთულ სამუშაოს აკეთებს მაღალმთიან აჭარაში.
• "დადის 24 საათის განმავლობაში და ფასდაუდებელ შრომას უწევს ჩვენს სამშობლოს და ჩვენს უწყებას ამ კონკრეტულ შემთხვევაში".
• რაც შეეხება გვრიტიშვილს ცოლს, მას ღირსეულ პროფესიონალს უწოდებს.
• "გიგაურის ჭორ-მონათხრობს არ აყვეთ", — ამბობს ქართული ოცნების ყოფილი დეპუტატი.