UFC-სა და კრივის ვარსკვლავების დაპირისპირება სპორტულ სამყაროში წლის ერთ-ერთი მთავარი მოვლენაა. ირლანდიელმა კონორ მაკგრეგორმა, კრივის ისტორიაში გამორჩეული სპორტსმენი, ფლოიდ მეივეზერი ჩხუბში გამოიწვია, რასაც მსოფლიოს აღფრთოვანება მოჰყვა. მათი შეხვედრა ორი ფაქტის გამოა განსაკუთრებული. პირველ რიგში, აღსანიშნია, რომ მაკგრეგორი UFC-ის ვარსკვლავია, მეივეზერი კი კრივის, რაც იმას ნიშნავს, რომ ორი განსხვავებული სპორტის წარმომადგენელი ერთმანეთს ხვდება. მეორე აღსანიშნი ფაქტი კი ისაა, რომ ამ შეხვედრაში მეივეზერი უდაო უპირატესობას ფლობს, რადგან ჩხუბი კრივის ფარგლებში გაიმართება.

ცხადია, ამ შეხვედრის მიმართ უდიდესი ინტერესი არსებობს და უამრავ ადამიანს სურს ისტორიული დაპირისპირების ცოცხლად ხილვა. ასეთი მასშტაბური დაინტერესების გამო, ინტერნეტში გამოჩნდა ყალბი საიტი, რომელმაც მეივეზერისა და მაკგრეგორის შეხვედრის ბილეთების გაყიდვა დაიწყო. რაც უნდა გასაკვირი იყოს, თაღლითებმა ათასობით ბილეთის გაყიდვა უმოკლეს დროში მოახერხეს. ბილეთები იმდენად სწრაფად გავრცელდა, რომ ოფიციალურმა პირებმა განცხადების გაკეთებაც ვერ მოასწრეს.

ყალბი ბილეთების ფასი $2 750-დან იწყებოდა და $6 400-მდე მერყეობდა. მას შემდეგ, რაც ბილეთებზე მოთხოვნა საკმაოდ მაღალი აღმოჩნდა, თაღლითებმა ბილეთების გაძვირება დაიწყო. ამ ხრიკს უამრავი გულშემატკივარი წამოეგო. ერთ-ერთმა დაზარალებულმა რამდენიმე ბილეთი შეიძინა, რაც დაახლოებით £5 000 დაუჯდა.

ფოტო: Mirror

ამის შესახებ საკუთარი ტვიტერის გვერდზე კომენტარი UFC-ს პრეზიდენტმა დენა უაითმაც გააკეთა. ის გულშემატკივრებს მოუწოდებს, რომ ამ თაღლითობას არ წამოეგონ. მისი თქმით, ბილეთების გაყიდვა არ დაწყებულა და მეტიც, ორგანიზატორებს ჯერჯერობით გადაწყვეტილიც არ აქვთ, რა ეღირება ჩხუბზე დასასწრები ბილეთები.

გავრცელებული ინფორმაციით, შეხვედრაზე დასასწრები ბილეთების რაოდენობა 20 ათასი იქნება, მათგან 19 ათასი კი სპონსორებს, მედიის წარმომადგენლებს, სხვადასხვა სფეროების ვარსკვლავებს, ორგანიზატორებს და ა.შ. დაურიგდება. გასაყიდად კი, მხოლოდ 1 000 ბილეთი გავრცელდება.

ცნობისთვის, მეივეზერისა და მაკგრეგორის შეხვედრა 26 აგვისტოს, ლოს-ანჯელესში, T-Mobile Arena-ზე გაიმართება. შეგახსენებთ, რომ მეივეზერი ჩხუბში მაკგრეგორმა გამოიწვია, რაც უამრავი ადამიანისთვის სენსაცია იყო. ფლოიდ მეივეზერს პროფესიონალურ კარიერაში 49 შეხვედრა აქვს ჩატარებული და მათგან ყველაში გაიმარჯვა. მაკგრეგორისთვის კი, ეს, მოკრივის რანგში პირველი პროფესიონალური შეხვედრა იქნება.