როგორც ჩანს, The Guardian ქართული კინემატოგრაფიით, განსაკუთრებით კი, ელდარ შენგელაიას შემოქმედებით დაინტერესდა. ერთ-ერთი ყველაზე გავლენიანი ბრიტანული გამოცემა ცისფერი მთების შემდეგ, ახლა უკვე შერეკილებს მიმოიხილავს.

"ელდარ შენგელაიას ახირებული კომედიის დასასრული აუცილებლად მოგგვრით სიცილს", — წერს The Guardian-ის კინოკრიტიკოსი პიტერ ბრედშოუ და შერეკილებს 5-დან 4 ვარსკვლავით აფასებს.

ბრედშოუს და დასავლელ მაყურებელს ქართული კინოკლასიკის ნახვის საშუალება სტრიმინგ პლატფორმა Klassiki-ზე მიეცათ, სადაც აღმოსავლეთ ევროპის, კავკასიისა და ცენტრალური აზიის ფილმოგრაფიაა განთავსებული.

"ესაა არასერიოზულობის ზეიმი, რომელიც რიჩარდ ლესტერის ან ტერი გილიემის ნამუშევრის ქართველი ბიძაშვილი გეგონება. ამ ექსცენტრიკული, უცნაური ფანტაზიის მთელი ეფექტი კი ბოლო 15 წუთშია", — ვკითხულობთ ბრედშოუს მიმოხილვაში.

რეცენზიის დასასრულს, მიმომხილველი ამბობს, ნეტავ, "თვითმფრინავი" ცოტა ადრე გამოჩენილიყო ფილმში, მის ყოველ დანახვაზე ხომ სიცილს ვერ შეიკავებო.

"ამ ყველაფერში არის რაღაც ძალიან უმწიკვლო", — ამატებს იგი.

ფოტო: ელდარ შენგელაია / ეროვნული ფოტომატიანე

რეზო გაბრიაძის სცენარის მიხედვით გადაღებული შერეკილები კინოეკრანებზე 1974 წელს გამოვიდა. ის ერთ-ერთი ყველაზე გამორჩეული ნამუშევარია, როგორც ელდარ შენგელაიას შემოქმედებაში, ასევე, ზოგადად, ქართულ კინოისტორიაში. ამაზე ისიც მეტყველებს, რომ გამოსვლიდან თითქმის ნახევარი საუკუნის შემდეგაც კი, ფრთიანი ფრაზები შერეკილებიდან არაერთმა თაობამ ზეპირად იცის. სპეციალურად ამ ფილმისთვის გია ყანჩელის მიერ შექმნილი მუსიკა კი ასევე ბევრისთვის საყვარელი მელოდიაა.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...