თბილისის სატრანსპორტო კომპანიის დირექტორი, ნუგზარ ჭეიშვილი კომპანიიდან მიღებულ შემოსავალს არ ამხელს. ჭეიშვილი თანამდებობაზე მუშაობის დროს მიღებული ანაზღაურების შესახებ არ მიუთითა არც თანამდებობის პირის მიერ შესავსებ დეკლარაციაში.

On.ge-მ ჭეიშვილის შემოსავლის გაგება რამდენიმე გზით სცადა:

  1. გამოითხოვა საჯარო ინფორმაცია თბილისის სატრანსპორტო კომპანიიდან;
  2. გამოითხოვა თანამდებობის პირის მიერ შევსებული დეკლარაცია საჯარო სამსახურის ბიუროდან;
  3. თბილისის სატრანსპორტო კომპანიაში კომენტარის სახით ითხოვა ხელმძღვანელი პირის ანაზღაურების შესახებ ინფორმაცია.

მცდელობების მიუხედავად, ჭეიშვილის ხელფასის დადგენა ვერ მოხერხდა.

ჭეიშვილი, როგორც თბილისის სატრანსპორტო კომპანიის დირექტორი თანამდებობის პირად ითვლება და დეკლარაციის შევსების ვალდებულება აქვს. თავის მხრივ, კომპანია ვალდებულია გასცეს ხელმძღვანელის მიერ აღებული ანაზღაურების შესახებ ინფორმაცია.

ნუგზარ ჭეიშვილი თბილისის სატრანსპორტო კომპანიის დირექტორის თანამდებობაზე 2016 წლიდან მუშაობს.