ახალი კვლევის მიხედვით, ღვინოში ოქროს ნაწილაკების დამატებით ე.წ. ჭკვიანი ზედაპირი იქმნება, რომელიც გოგირდის ნაერთებს იზიდავს, რითაც სასმლის არომატს აუმჯობესებს. ამ საქმეში ოქროს ჩართვა შესაძლოა, ძვირადღირებულ სიამოვნებად მოგეჩვენოთ, მაგრამ ის მრავალჯერად გამოყენებას ექვემდებარება, რაც ხარჯებს ამცირებს, სამაგიეროდ კი უფრო გემრიელ ღვინოს იღებთ.

უკანასკნელი მიგნება ავსტრალიელებს ეკუთვნით, სადაც მეღვინეობაში თანამედროვე მიდგომები აქტიურად ინერგება. სწორედ ამის მაგალითია ნანოტექნოლოგიაც, რომელსაც მათ მინარევებისგან გასათავისუფლებლად მიმართეს. კერძოდ, სპეციალისტებმა სასმლის ზემოდან პლაზმის პოლიმერი და 68 ნანომეტრი ზომის ოქროს ნაწილაკები მოათავსეს. მართალია, ის რეაქციულ ლითონად არ მიიჩნევა, მაგრამ გოგირდოვან ნივთიერებებს კარგად იერთებს. ასეთია გოგირდწყალბადი და უფრო რთული მოლეკულური სტრუქტურის მქონე მეთანთიოლი.

რაც მთავარია, მსგავსი ჭკვიანი ზედაპირის გამოყენება ძალიან მარტივია და მხოლოდ მის დამატებას, შემდეგ კი გარკვეულ პერიოდში ამოღებას გულისხმობს.

ფოტო: Getty

ღვინოში გოგირდს არასასურველად უსიამოვნო სუნი აქცევს, ამიტომ მეღვინეები ცდილობენ, მისი კონცენტრაცია მინიმუმამდე დაიყვანონ. როგორც წესი, მისგან გასათავისუფლებლად სპილენძს მოიხმარენ, რომელიც ცუდ გემოს ტოვებს და დიდი დოზით ჯანმრთელობისთვის საშიშია.

ექსპერიმენტებმა აჩვენა, რომ ნანონაწილაკებმა უფრო მეტი გოგირდწყალბადი შთანთქა, ვიდრე სპილენძმა. ეს შედეგი დაფიქსირდა როგორც თეთრი, ასევე წითელი ღვინის შემთხვევაში, თანაც მან ისეთი გოგირდოვანი ნაერთები დატოვა, რომლებიც ამ სასმელს სასიამოვნო გემოს სძენს.

ავტორთა ნაშრომი გამოცემაში npj Science of Food გამოქვეყნდა.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.