დასამალი არაა, რომ მენტალური პრობლემები საკმაოდ გავრცელებულია და დღეს 5-დან 1 ადამიანს ერთ-ერთი მათგანი მაინც აქვს. მიუხედავად მისი მნიშვნელობისა, საკმაოდ მწირი დრო ეთმობა ამ თემაზე საუბარს საზოგადოებაში. რაც გამოწვეულია გავრცელებული სტიგმით, თითქოს, მსგავსი პრობლემების მქონე ადამიანებს არ შეუძლიათ სოციუმის სრულფასოვანი წევრები იყვნენ და მათი მდგომარეობა ერთგვარი სისუსტეა. ამის გამო უმრავლესობა თავის მდგომარეობას მალავს და 60% მკურნალობას არც კი იწყებს. Mental Health Commission of Canada-ს კვლევებმა აჩვენა, რომ დასაქმებულთა 30%-ს ურჩევნია თავისი მენტალური პრობლემები არ გაუცხადოს დამსაქმებელს. WHO-ს სტატისტიკების თანახმად, მიუხედავად იმისა, რომ შეიძლება დასაქმებულები მალავდნენ თავიანთ პრობლემას, მენტალური ჯანმრთელობის პრობლემების მქონე ადამიანებს შეუძლიათ იყვნენ ისეთივე პროდუქტიულები, როგორც სხვა თანამშრომლები. დამსაქმებლები ხშირად აღნიშნავენ, რომ ასეთი დასაქმებულები ხანდახან გამოირჩევიან კიდეც პუნქტუალურობით, მოტივაციითა და სამაგალითო შედეგებით.

რაც მეტადაა პრობლემა ბურუსით მოცული, მით მეტადაა მის გარშემო მცდარი წარმოდგენები. პირველი ნაბიჯის გადადგმა და პრობლემის გაცხადება ყველაზე რთული და, ამავე დროს, გაბედული საქციელია. თუ დღეს შენ ხმამაღლა ლაპარაკობ შენს პრობლემაზე, მასთან გამკლავების გზებსა და გამოცდილებებზე, შეიძლება ამან ხვალ სხვას უბიძგოს სწორი მიმართულებით წასვლისკენ, მისცეს მხნეობა, დაიწყოს მკურნალობა. მენტალურ ჯანმრთელობაზეც ისევე უნდა ვზრუნავდეთ, როგორც ფიზიკურზე, მხოლოდ ამ შემთხვევაში შევძლებთ სრულფასოვანი, ჰარმონიული მდგომარეობის მიღწევას.

კვლევებმა ისიც აჩვენა, რომ თუ ადამიანები მიმართავენ საჭირო ზომებს მენტალური ჯანმრთელობის პრობლემების მოგვარებისთვის, 70%-90% შემთხვევაში შედეგები ეფექტურია. მკურნალობის დასაწყებად კი, პირველ რიგში, საჭიროა პრობლემის აღმოჩენა და მასზე საუბარი.

მენტალური ჯანმრთელობა ზოგადი კეთილდღეობის ძირითადი კომპონენტია. ეს კარგად ესმით თიბისი დაზღვევაში და ამიტომ კომპანიას მიზნად აქვს, საზოგადოებას შეახსენოს, რომ ფსიქიკურ ჯანმრთელობაზე ხმამაღლა საუბარი მოსულა და დასამალი არაფერია.

თიბისი დაზღვევა აქტიურად უჭერს მხარს მენტალურ ჯანმრთელობაზე ზრუნვას. ის იყო პირველი ქართულ ბაზარზე, რომელმაც ჯანმრთელობის დაზღვევას მენტალური ჯანმრთელობის დაფარვა დაამატა და ასევე პირველია რეგიონში, სადაც თანამშრომლებს მენტალური შვებულებით სარგებლობა შეუძლიათ.

ამჯერად თიბისი დაზღვევამ წამოიწყო კამპანია "დასამალი არაფერია", რომლის ფარგლებშიც ცნობილი ადამიანები საუბრობენ თავიანთ მენტალურ მდგომარეობაზე და გვახსენებენ ფსიქიკური ჯანმრთელობის მნიშვნელობას. გვიყვებიან იმაზე, თუ რა შედეგებამდე შეიძლება პრობლემის დამალვამ მიგვიყვანოს.

თუ კი რაიმე გვაწუხებს, უნდა გვახსოვდეს, რომ მარტო არ ვართ და, შეიძლება, ჩვენს გვერდით მდგომსაც ისევე სჭირდებოდეს დახმარება, როგორც ჩვენ, ამიტომ დასამალი არაფერია.