საქართველოს ეროვნულმა ბანკმა ოქტომბერში ლარის კურსის შესანარჩუნებლად 591,1 მლნ დოლარი გაყიდა, — ინფორმაციას ეროვნული ბანკის მიერ სავალუტო ბაზარზე განხორციელებული ოპერაციების დეტალურ სტატისტიკაზე დაყრდნობით BM.GE ავრცელებს.

მათივე ინფორმაციით, ამ თანხის დიდი ნაწილი, 377,7 მლნ დოლარი, სებ-მა აუქციონის გარეშე გაყიდა - ანუ ისე, რომ გაყიდვაზე ინფორმაცია არ გაუვრცელებია.

აუქციონის გარეშე რეზერვიდან გაყიდული დოლარის შესახებ მონაცემები ეროვნულმა ბანკმა 25 ნოემბერს გაასაჯაროვა. ამ დრომდე მხოლოდ 213,4 მლნ დოლარის გაყიდვის შესახებ იყო ცნობილი.

გასულ თვეში დოლარის გაყიდვას ეროვნული ბანკი "არაფუნდამენტური ფაქტორების ჭარბი გავლენისა და სავალუტო ბაზარზე წინასაარჩევნო პერიოდისთვის ტრადიციულად დამახასიათებელი აჟიოტაჟის პრევენციის მიზნით" ხსნიდა.

2024 წლის 1 იანვრიდან 31 ოქტომბრის ჩათვლით, ეროვნულმა ბანკმა სავალუტო რეზერვები 587,9 მილიონი დოლარით შეამცირა.