ქართული ოცნების პარლამენტი საქართველოს პრეზიდენტის არჩევნების ჩატარებას 14 დეკემბერს გეგმავს, — ამის შესახებ შალვა პაპუაშვილმა დღეს, 26 ნოემბერს, ბიუროს სხდომაზე განაცხადა.

მისივე თქმით, ახალი პრეზიდენტის ინაუგურაცია მესამე კვირა დღეს, 2024 წლის 29 დეკემბერს ჩატარდება.

"მე შემოვდივარ ამ შემთხვევაში წინადადებით, რომელიც ეხება პრეზიდენტის არჩევნების ჩანიშვნის თარიღს და ამას შევიტანთ დღის წესრიგში, შემდეგ პარლამენტის პლენარული სხდომის სესიის ფარგლებში დავამტკიცებთ, რომ ჩატარდეს 2024 წლის 14 დეკემბერს, ინაუგურაცია ჩატარდება 29 დეკემბერს", — განმაცხადა შალვა პაპუაშვილმა ბიუროს სხდომაზე.

საქართველოში პირველად პრეზიდენტი არაპირდაპირი წესით, საარჩევნო კოლეგიის მიერ ირჩევა. მომავალი პრეზიდენტს 300-წევრიანი საარჩევნო კოლეგია ღია კენჭისყრით აირჩევს.

საქართველოს პრეზიდენტს ხუთი წლის ვადით, დებატების გარეშე, ღია კენჭისყრით საარჩევნო კოლეგია აირჩევს. საარჩევნო კოლეგიას დაამტკიცებს ცენტრალური საარჩევნო კომისია. კოლეგია 300 წევრისგან იქნება დაკომპლექტებული, მათ შორის იქნებიან პარლამენტის 150-ვე წევრი, აფხაზეთის ავტონომიური რესპუბლიკის უმაღლესი საბჭოს 20 წევრი, აჭარის უმაღლესი საბჭოს 21 წევრი და თვითმმართველობის წარმომადგენლები (109 წევრი) 2021-2022 წელს პარტიების მიერ მიღებული მხარდაჭერის პროპორციის შესაბამისად.

სალომე ზურაბიშვილი საქართველოს რიგით მეხუთე პრეზიდენტად 2018 წლის 28 ნოემბერს აირჩიეს, ინაუგურაცია კი 16 დეკემბერს გაიმართა.