სახალხო დამცველის განცხადებით, 25 ნოემბერს საქართველოს პარლამენტი სრულად ლეგიტიმურად შეიკრიბა. ჟურნალისტებთან საუბარში ლევან იოსელიანმა აღნიშნა, რომ კონსტიტუციის თანახმად, საქართველოს პარლამენტი უნდა შეიკრიბოს ცესკოს შემაჯამებელი ოქმის გამოცემიდან არაუგვიანეს 10 დღისა.

"საქართველოში არსებობს საპარლამენტო ომბუდსმენის ინსტიტუტი, რაც ნიშნავს იმას, რომ ომბუდსმენი ანგარიშს წერს, ამზადებს პარლამენტისთვის. შესაბამისად, სადაც ჩვენ მთელი წელი ვმუშაობთ და ვშრომობთ, ეს არის საქართველოს პარლამენტი, რომელსაც ანგარიშს წარვუდგენთ. შესაბამისად, არ მესმის თქვენი კითხვის შინაარსი ლეგიტიმაციასთან დაკავშირებით. საქართველოს პარლამენტი სრულიად ლეგიტიმურად შეიკრიბა კონსტიტუციის 38-ე მუხლის თანახმად, სადაც ცალსახად წერია, რომ შემაჯამებელი ოქმის გამოცხადების შემდეგ, 10 დღეში პარლამენტი იკრიბება. ყველა სხვა მუხლი, სხვა დათქმა, მათ შორის საკონსტიტუციო სარჩელი ვერ იქნება უფრო აღმატებული, ვიდრე კონსტიტუციის ჩანაწერი, სადაც ცალსახად წერია, რომ არაუგვიანეს 10 დღეში პარლამენტი უნდა შეიკრიბოს, რაც ასეც მოხდა და რაც რა თქმა უნდა, ლეგიტიმური იყო“, — განაცხადა ლევან იოსელიანმა.

სახალხო დამცველის თქმით, ყველა სხვა საკითხი, მათ შორის საკონსტიტუციო სარჩელი, განხილვის საკითხია.