ამის შესახებ საუბარია რუსეთის საგარეო საქმეთა სამინისტროს განცხადებაში, რომელიც ჟენევის საერთაშორისო დისკუსიის დასრულების შემდეგ გამოქვეყნდა.

რატომ არის მნიშვნელოვანი: ეს პირველი შემთხვევა არ არის, როცა საქართველოს ხელისუფლებისა და ოკუპანტი რეჟიმის რიტორიკა ერთმანეთს ემთხვევა.

  • 21 მარტს ოკუპირებული აფხაზეთის დე ფაქტო ლიდერმა ქართულ ოპოზიციაზე "ოცნების" ენით ისაუბრა და თქვა, რომ ისინი ცდილობენ, დაამხონ მოქმედი ხელისუფლება და გახსნან "მეორე ფრონტი" ქვეყანაში.
  • ამავე კონტექსტში ბჟანიამ მორიგჯერ შეაქო საქართველოს მთავრობა და თქვა, რომ ისინი ოპოზიციის ამ მცდელობას ეწინააღმდეგებიან.

დეტალები: რუსეთის საგარეო უწყება ირწმუნება, რომ "კოლექტიური დასავლეთი" კონფრონტაციის ამიერკავკასიაში გადატანას ცდილობს, რაც, მათივე მტკიცებით, გამოიხატება პროვოკაციულ მოწოდებებში თბილისის მიმართ, გახსნას "მეორე ფრონტი" რუსეთის წინააღმდეგ აფხაზეთსა და სამხრეთ ოსეთში.

  • "ასეთი საშიში განცხადებები მოითხოვს სწრაფ რეაგირებას ჟენევის საერთაშორისო დისკუსიის თანათავმჯდომარეებისა და იმ ორგანიზაციებისგან, რომლებსაც წარმოადგენენ", — ნათქვამია განცხადებაში.
  • აქვე ვკითხულობთ, რომ არსებული ვითარების განხილვისას კმაყოფილებით აღინიშნა სოხუმის, თბილისისა და ცხინვალის განწყობა, განაგრძონ თავშეკავება.
  • "ჟენევის პლატფორმის მუშაობაში პაუზის მიუხედავად, შესაძლებელი გახდა დიალოგის შენარჩუნება მოლაპარაკების სხვა გზებზე, მათ შორის, ცხელი ხაზის მეშვეობით და ინციდენტების პრევენციისა და მათზე რეაგირების მექანიზმის ფარგლებში".