საერთაშორისო გამჭვირვალობა — საქართველომ 2010-2022 წლებში ელექტროენერგეტიკის სექტორის კვლევა გამოაქვეყნა.

რატომ არის მნიშვნელოვანი: ანგარიშის თანახმად, ელექტროენერგიის შიდა მოხმარება უფრო მეტად გაიზარდა, ვიდრე გამომუშავება, რამაც ელექტროენერგიის იმპორტის ზრდა გამოიწვია.

  • იმპორტის ზრდამ და ლარის გაუფასურებამ კი ელექტროენერგიის ტარიფი მნიშვნელოვნად გაზარდა.

დეტალები: კვლევის ავტორების თქმით, საქართველოში ელექტროენერგიის იმპორტი ხორციელდება შუამავალი კომპანიების მეშვეობით, რომლებიც ყოფილ მაღალი თანამდებობის საჯარო მოხელეებს ეკუთვნით.

  • "შუამავალი კომპანიები ელექტროენერგიის იმპორტს მოგების მიღების მიზნით ახორციელებენ, რაც ტარიფს ზრდის. პასუხგაუცემელია კითხვა, რატომ გაჩნდა ამ პროცესში შუამავლების ჩართვის აუცილებლობა", — ვკითხულობთ კვლევაში.
  • TI-ის ცნობით, აზერბაიჯანიდან ელექტროენერგიის იმპორტში შუამავლად ყოფილი პრემიერმინისტრის, ზურაბ ნოღაიდელის მიერ დაფუძნებული კომპანია Elgreen Holdings Incorporated არის ჩართული.
  • რუსეთიდან ელექტროენერგიის იმპორტში კი — ლუქს ენერჯი ტრეიდინგი, რომლის 50.01% რუსულ ინტერ რაოს ეკუთვნის, ხოლო 49.99% — საქართველოს ელექტროენერგეტიკული სისტემის კომერციული ოპერატორის (ესკო-ს) ყოფილ გენერალურ დირექტორს, ვახტანგ ამბოკაძეს.

რუსეთზე დამოკიდებულება: კვლევის თანახმად, საქართველო რუსულ ელექტროენერგიაზე მნიშვნელოვნად არ არის დამოკიდებული და მათგან ელექტროენერგიის სრულად შეწყვეტის შემთხვევაშიც კი ენერგოკრიზისი არ შეიქმნება.

  • TI-ის ინფორმაციით, 2021 წელს იმპორტში რუსეთის წილი 25% იყო, 2022 წელს 58%-მდე გაიზარდა, თუმცა, რუსული ელექტროენერგიის წილი საქართველოს შიდა მოხმარებაში მაინც დაბალ ნიშნულზე შენარჩუნდა: 2021 წელს 1.8% იყო, ხოლო 2022 წელს — 2.6%.
  • რუსეთის მოქალაქეების და კომპანიების საკუთრებაში არსებულ ჰესებზე საქართველოში გამომუშავებული ელექტროენერგიის მხოლოდ 5% მოდის. ეს ჰესებია: ხრამი ჰესი 1, ხრამი ჰესი 2, ლარსი ჰესი და შილდა ჰესი.