საქართველოს შინაგან საქმეთა სამინისტროს მომსახურების სააგენტო პატრულის 176 ავტომობილს ყიდულობს. ავტომობილების შესაძენად ტენდერი 14 ივნისს გამოცხადდა და შესყიდვის სავარაუდო ღირებულებად 8 487 560 ლარი განისაზღვრა.

სატენდერო წინადადების მიხედვით, ავტომობილები უწყებას გამარჯვებულმა კომპანიამ ხელშეკრულების გაფორმებიდან 60 დღეში უნდა მიაწოდოს. გარდა ამისა, საგარანტიო პერიოდად განსაზღვრულია ორწლიანი პერიოდი.

On.ge შსს-ს მომსახურების სააგენტოს დაუკავშირდა და ჰკითხა, რატომ გახდა ახალი ავტომობილების ყიდვა საჭირო. ოთხდღიანი ლოდინის შემდეგ უწყებაში განაცხადეს, რომ პასუხს წერილობით, საჯარო ინფორმაციის წესით გასცემენ.

საპატრულო პოლიციის თანამშრომლებისთვის ახალი მანქანები ორწელიწადნახევრის წინაც იყიდეს. ნეტგაზეთის ინფორმაციით, მაშინ 160 ერთეული ფორდის ავტომობილის შეძენა 4 640 000 აშშ დოლარი დაჯდა.