102 წლის ჯინ ბეილი, რომელიც ნებრასკაში ცხოვრობს, კვირაში 4-ჯერ ფიტნესის გაკვეთილებს უძღვება. მართალია, ჯინი მოსწავლეებს სკამიდან ხელმძღვანელობს და მათ სხვადასხვა ვარჯიშის სწორად გაკეთებას ასწავლის, თუმცა ფიტნესის ჯგუფის წევრები აღნიშნავენ, რომ ის საკმაოდ მკაცრი მწვრთნელია.

"როცა დავბერდები, სამსახურს მაშინ დავტოვებ. ჩემი გოგოები მეუბნებიან, რომ ვარჯიშის დროს უხეში ვარ, თუმცა მხოლოდ ის მინდა, მოძრაობები სწორად გააკეთონ და კუნთები გამოიყენონ", — ამბობს ჯინი. 102 წლის ქალმა აქტიური ვარჯიში პანდემიის პერიოდში დაიწყო. მისი თქმით, ჯგუფში თავიდან ერთი კაციც ვარჯიშობდა, მაგრამ ის გარდაიცვალა და ახლა მხოლოდ გოგოები დარჩნენ.

ფოტო: The Washington Post

ჯინის თქმით, პანდემიის დროს აქტიური ცხოვრების მიტოვება არ სურდა და ამავდროულად, ადამიანების მოტივაციაც კარგად გამოსდის. სწორედ ამიტომ, თავდაპირველად მან მეზობლები მიიწვია და მათ მარტივი ვარჯიშები ასწავლა. ამის შემდეგ კი უკვე 4 წელი გავიდა და ფიტნესის გაკვეთილები მათი ყოველდღიურობის ნაწილი გახდა. "თუ გონება და სხეული არ ავარჯიშე, მაშინ საერთოდ რატომ ხართ აქ", — ამბობს 102 წლის ჯინი.

ფოტო: The Washington Post

ჯინი 102 წლის ასაკშიც დამოუკიდებელი ცხოვრებით ცხოვრობს. როგორც თავად აღნიშნავს, ჭამასა და ბანაობაში სხვისი დახმარება არ სჭირდება და ტანსაცმელსაც თავად იუთოებს."მთელი დღე ჯდომა და ტელევიზორის ყურება უაზრობა მგონია. როგორ ჩანს, ღმერთი ჩემს მისაღებად ჯერ მზად არ არის, ამიტომ მანამდე დაკავებული უნდა ვიყო", — გაიხუმრა ჯინმა.