რატომ არის მნიშვნელოვანი: ღია მმართველობის მუდმივმოქმედი საპარლამენტო საბჭო 2015 წელს შეიქმნა, საკონსულტაციო ჯგუფი კი ადგილობრივი არასამთავრობო, საერთაშორისო და დონორი ორგანიზაციებით იყო დაკომპლექტებული.

• NGO-ების განცხადებით, წლების განმავლობაში დეპუტატებთან და პარლამენტის აპარატთან ერთად დონორი ორგანიზაციების დახმარებით, მუშაობდნენ და მხარს უჭერდნენ რეფომრებს, რომლებიც საკანონმდებლო ცვლილებებს და პრაქტიკულ სამუშაოებს მოიცავდა.
• აღნიშნავენ რეფომები სხვადასხვა მიმართულებით — საპარლამენტო ღიაობის, გამჭვირვალობის, მოქალაქეთა ჩართულობის და ინოვაციებისა და ტექნოლოგიების განვითარების მიმართულებით განხორციელდა.
• "რამაც ხელი შეუწყო საპარლამენტო საქმიანობის შესახებ ინფორმაციის მეტ ღიაობას, ინკლუზიური გარემოს შექმნას, საკანონმდებლო პროცესში მოქალაქეების ჩართულობას".
• გარდა ამისა, დონორი ორგანიზაციების დახმარებით შეიქმნა პარლამენტის ვებგვერდი, პარლამენტის შენობის ინფრასტრუქტურა გახდა შშმ პირებზე ადაპტირებული, პარლამენტის ვებგვერდზე გამოქვეყნდა სხვადასხვა ინფორმაცია, მათ შორის ლობისტების რეესტრი, სტატისტიკური მონაცემები.
• ამასთან, დაინერგა საპარლამენტო პეტიციების პლატფორმა, შეიქმნა და ტექნიკით აღიჭურვა მოქალაქეთა მისაღები, შეიქმნა პარლამენტის მობილური აპლიკაცია და სხვა.

დეტალები: ორგანიზაციების თქმით, ამ რეფორმების წყალობით, ღია მმართველობის პარტნიორობის თანამეგობრობაში საქართველო წლების განმავლობაში ერთ-ერთი მოწინავე ქვეყანა და წარმატებული თანამშრომლობის მაგალითი იყო.

• აღნიშნავენ, რომ ამ ხნის მანძილზე მოუწიათ სამი მოწვევის პარლამენტარებთან მუშაობა, პროცესი იყო თანამშრომლობით და მასში როგორც უმრავლესობა, ასევე, ოპოზიცია მონაწილეობდა.
• თუმცა, მაშინ, როდესაც სამოქალაქო ორგანიზაციები საპარლამენტო უმრავლესობასთან თანამშრომლობენ, მხარს უჭერენ და ფინანსურ დახმარებას უწევევნ რეფორმებში, მათ "უცხოური გავლენის აგენტების შესახებ" კანონი დააინიცირეს.
• ხაზს უსვამენ, რომ ამ კანონის მიზანი საქართველოში სამოქალაქო საზოგადოების ორგანიზაციების სტიგმატიზება და საზოგადოებაში დისკრედიტირება, კონტროლი, საბოლოო ჯამში კი საქმიანობის შეზღუდვა და გაუქმება იყო.

ორგანიზაციების განცხადებაში საუბარია კანონთან დაკავშირებით საერთაშორისო საზოგადოების კრიტიკაზე და იმაზე, რომ ამის მიუხედავად პარლამენტმა მას მხარი პირველი მოსმენით მაინც დაუჭირა.

• "მართალია, კანონპროექტის წინააღმდეგ მიმართული რამდენიმედღიანი სახალხო პროტესტის საპასუხოდ, მმართველმა პარტიამ კანონპროექტი უკან გაიწვია, მაგრამ მათ ნათლად დაადასტურეს რომ ისინი რჩებიან რუსული კანონპროექტის პრინციპების ერთგულნი და, სამომავლოდ უფრო აქტიურად გააგრძელებენ საზოგადოებრივი საინფორმაციო კამპანიას კანონპროექტის მხარდასაჭერად".
• "ყოველივე ზემოთ აღნიშნულიდან გამომდინარე, ღია მმართველობის მუდმივმოქმედი საბჭოს საკონსულტაციო ჯგუფში შემავალი ორგანიზაციები ვეღარ ვხედავთ საპარლამენტო უმრავლესობასთან ამ ფორმატში თანამშრომლობის პერსპექტივას და ვაჩერებთ წევრობას საკონსულტაციო ჯგუფში", — ნათქვამია განცხადებაში.
• ხელმომწერები არიან საკონსულტაციო ჯგუფის წევრი ორგანიზაციები: ინფორმაციის თავისუფლების განვითარების ინსტიტუტი (IDFI) — საკონსულტაციო ჯგუფის თავმჯდომარე; საერთაშორისო გამჭვირვალობა საქართველო;
• ასევე, სამოქალაქო საზოგადოების ინსტიტუტი (CSI); საქართველოს ახალგაზრდა იურისტთა ასოციაცია (საია).