პუტინმა განაცხადა, რომ რუსეთი ბირთვული ძალების გაძლიერებას განსაკუთრებულ ყურადღებას დაუთმობს.

რატომ არის მნიშვნელოვანი: უკრაინაში სრულმასშტაბიანი შეჭრის შემდეგ, გაჭიანურებული სამხედრო წარმატებების და უკრაინის კონტრშეტევის ფონზე, რუსეთი შიგადაშიგ ბირთვულ მუქარებს აძლიერებს.

  • ოკუპანტი ქვეყნის პრეზიდენტმა ჩვეულებას არც ომის მოახლოებულ წლისთავზე უღალატა.
  • პუტინის კომენტარები მოჰყვა შეერთებულ შტატებთან ბირთვული იარაღის კონტროლის ორმხრივი ხელშეკრულების შეჩერებას.

დეტალები: დიქტატორის ცნობით, წელს პირველად რუსეთი საერთაშორისო ბალისტიკურ რაკეტებს განალაგებს, იარაღს, რომელსაც შეუძლია მრავალი ბირთვული ქობინის გადატანა.

  • პუტინი აპირებს, მეტი ყურადღება დაუთმოს ბირთვული ტრიადის გაძლიერებას.
  • "ჩვენ გავაგრძელებთ საჰაერო დაფუძნებული ჰიპერბგერითი Kinzhal სისტემების მასობრივ წარმოებას და დავიწყებთ საზღვაო ბაზაზე დაფუძნებული ცირკონის ჰიპერბგერითი რაკეტების მასობრივ მიწოდებას", — ნათქვამია რუსეთის პრეზიდენტის განცხადებაში.

ამასთანავე, ორშაბათს, ვარშავაში მყოფმა ბაიდენმა პუტინი გააფრთხილა, რომ START-ის შეჩერება დიდი შეცდომა იყო.

  • რუსეთის თავდაცვის მაღალჩინოსანმა განაცხადა, რომ მოსკოვი დაიცავს შეთანხმებულ ლიმიტებს ბირთვული რაკეტების შესახებ და განაგრძობს შეერთებულ შტატებს ინფორმირებას მის განლაგების ცვლილებების შესახებ.
  • ბაიდენმა პირობა დადო, რომ შეერთებული შტატები დაიცავს ნატოს ფაქტობრივად ყველა სანტიმეტრს.

კონტექსტი: სტრატეგიული შეიარაღების შემცირებისა და შეზღუდვის შეთანხმება, იგივე New START, რუსეთმა აშშ-სთან 2010 წელს გააფორმა და მისი ვადა 2026 წლის 4 თებერვალს იწურება.

  • ეს ერთადერთი შეთანხმებაა, რომელიც ბირთვული იარაღის, მათ შორის, კონტინენტთაშორისი ბალისტიკური რაკეტის (ICBM), წყალქვეშა ნავიდან გასაშვები ბალისტიკური რაკეტისა (SLBM) და ბირთვული შეიარაღებისთვის განკუთვნილი მძიმე ბომბდამშენების განთავსების საკითხებს არეგულირებს.
  • პუტინის შეფასებით, აშშ NATO-ს საშუალებით რუსეთს ულტიმატუმებს უყენებდა და შეთანხმების პუნქტების შესრულებას აიძულებდა, თავად კი დაკისრებულ ვალდებულებებს არ ასრულებდა.
  • კრემლის ლიდერი ხაზს უსვამს, რომ არ გამოდიან შეთანხმებიდან, მაგრამ აჩერებენ მასში მონაწილეობას.