გაერთიანებული ერების ორგანიზაციის შეხვედრა ნიუ-იორკში გაიმართა.

რატომ არის მნიშვნელოვანი: უკრაინაში ომის დაწყებიდან ერთი წელი გავიდა, რის გამოც რის გამოც ორგანიზაციამ ომისა და ძალადობის დასაგმობად და უკრაინის მხარდაჭერის გამოსახატად საგანგებო სხდომა გამართა.

  • საგარეო საქმეთა მინისტრმა, ილია დარჩიაშვილმა დაგმო რუსეთის მიერ უკრაინის წინააღმდეგ წარმოებული ომი და აღნიშნა, რომ ეს არის თავდასხმა მთელ საერთაშორისო წესრიგზე და არღვევს გლობალური მშვიდობისა და უსაფრთხოებას.
  • აღნიშნა, რომ რუსეთის აგრესიას უკრაინაში მოჰყვა უმძიმესი ჰუმანიტარული შედეგები, მსხვერპლი და მოსახლეობის მასობრივი გადაადგილება.
  • მისი განცხადებით, მშვიდობის აღდგენა შესაძლებელია მხოლოდ ძლიერი პასუხისმგებლობის პირობებში, ორგანიზაციის წევრი ქვეყნების მიერ გაეროს ფუძემდებლური პრინციპების დაცვის გზით.

დეტალები: მინისტრმა საქართველოს სახელით მხარდაჭერა გამოუცხადა მშვიდობის ფორმულის ინიციატივას, რომელიც, მისი განცხადებით, უკრაინის ტერიტორიული მთლიანობისა და სუვერენიტეტის დაცვის მიღმა, გაეროს ძირითადი ღირებულებებისა და ფასეულობების დაცვასაც ეხმაურება.

  • "უკრაინას სჭირდება მშვიდობა. ვაწყდებით უპრეცედენტო მასშტაბის გლობალურ გამოწვევებს: კლიმატის ცვლილებას, სტიქიურ უბედურებებს, ტერორიზმს", — თქვა დარჩიაშვილმა.
  • მან ასევე ისაუბრა რუსეთის მიერ საქართველოს რეგიონების — აფხაზეთისა და ცხინვალის ოკუპაციასა და ადგილზე არსებულ მძიმე ვითარებაზეც.
  • თქვა, რომ საქართველო კვლავ ერთგულია რუსეთ-საქართველოს კონფლიქტის მშვიდობიანი გზით მოგვარების.
  • "რაც, ერთი მხრივ, რუსეთის მიერ ოკუპირებული საქართველოს ორი რეგიონის დეოკუპაციაზე, ხოლო მეორე მხრივ, საოკუპაციო ხაზებით გაყოფილი მოსახლეობის შერიგებასა და ნდობის განმტკიცებაზეა დამოკიდებული", — განაცხადა მინისტრმა.

ილია დარჩიაშვილმა თქვა, რომ საქართველო სრულყოფილად ასრულებს ევროკავშირის მედიაციით მიღებულ 2008 წლის 12 აგვისტოს ცეცხლის შეწყვეტის შეთანხმებას.

  • მისი განმარტებით, საერთაშორისო თანამეგობრობის კონსოლიდირებული მიდგომა აუცილებელია, რათა რუსეთმა შეასრულოს ცეცხლის შეწყვეტის შეთანხმებით ნაკისრი ვალდებულებები და გაიყვანოს თავისი სამხედრო ძალები საქართველოს ტერიტორიიდან.
  • ამბობს, რომ ამ მხრივ საქართველო ცდილობს გამოიყენოს ჟენევის საერთაშორისო მოლაპარაკებები.