რეზოლუციაზე ევროპარლამენტში 5 სხვადასხვა ჯგუფი მუშაობდა.

რატომ არის მნიშვნელოვანი: 15 თებერვალს ევროპარლამენტში კენჭი უყარეს რიგით მესამე რეზოლუციას, რომელიც სააკაშვილის გათავისუფლებასა და მის დასავლურ კლინიკაში სამკურნალოდ გადაყვანას მოითხოვს.

  • რეზოლუციის ტექსტში შესულია შესწორებაც, სადაც ბიძინა ივანიშვილი ოლიგარქად არის მოხსენიებული და მისთვის სანქციების დაკისრებაა მოთხოვნილი.

დეტალები: რეზოლუციაში, რომელსაც 577 მომხრე და 33 მოწინააღმდეგე ჰყავდა, გამოთქმულია შეშფოთება სააკაშვილის მიმართ საქართველოს ხელისუფლების "არაადეკვატური რეაგირების" გამო.

  • "ვინაიდან საქართველოს სახალხო დამცველის მიერ თბილისის საქალაქო სასამართლოში წარდგენილი დასკვნის მიხედვით, მიხეილ სააკაშვილის ჯანმრთელობის მდგომარეობა მკვეთრად გაუარესდა ბოლო თვეების განმავლობაში, მისი მდგომარეობა შეფასებულია როგორც მძიმე და ის უნდა გათავისუფლდეს სამკურნალოდ", — ნათქვამია ტექსტში.
  • გარდა ამისა, ევროპარლამენტი სალომე ზურაბიშვილს მოუწოდებს, გამოიყენოს კონსტიტუციური უფლება და შეიწყალოს მიხეილ სააკაშვილი.
  • ევროპარლამენტარები ხაზს უსვამენ, რომ ყოფილი პრეზიდენტის ჯანმრთელობის მდგომარეობის გაუმჯობესებაში მუდმივი წარუმატებლობა კვლავ აზიანებს საქართველოს რეპუტაციას და აფერხებს ევროკავშირში მისი კანდიდატურის პერსპექტივას.
  • "მიხეილ სააკაშვილის პატიმრობაში სიკვდილი დარტყმა იქნება ქართული დემოკრატიისთვის და საქართველოს საერთაშორისო რეპუტაციისთვის".