ამის შესახებ იელის უნივერსიტეტის ჰუმანიტარული კვლევითი ლაბორატორიის ანგარიშშია საუბარი.

რატომ არის მნიშვნელოვანი: უკრაინაში სრულმასშტაბიანი ომის დაწყების შემდეგ ათასობით უკრაინელი ბავშვი ოკუპანტ ქვეყანაში იძულებით გადასახლებულია.

  • ბავშვთა უფლებების კომისრის თქმით, იდენტიფიცირებულია რუსეთის არმიის მიერ გატაცებული და დეპორტირებული თითქმის 14 000 ბავშვის მონაცემები.
  • ომის კვლევის ინსტიტუტი კი წერს, რომ ბავშვებს, რომლებიც უკრაინიდან უკანონოდ გაჰყავთ, რუსეთში აშვილებენ.
  • გამოძიების თანახმად, რუსეთსა და ყირიმში შექმნილი ბანაკების მიზანი რუსეთის მთავრობის იდეოლოგიაში უკრაინელი ბავშვების ინტეგრირებაა.
  • გარდა ამისა, ყირიმისა და ჩეჩნეთის ბანაკებში უკრაინელ ბავშვებს ცეცხლსასროლი იარაღისა და სამხედრო აღჭურვილობის გამოყენებას ასწავლიან.

დეტალები: კვლევის ავტორები ამბობენ, რომ რუსეთისა და ანექსირებული ყირიმის ტერიტორიაზე, მინიმუმ, 43 დაწესებულებაა, სადაც 4 თვიდან 17 წლამდე ბავშვების "ხელახალ იდეოლოგიურ განათლებაზე" მუშაობენ.

  • მათივე ინფორმაციით, ომის დაწყების დღიდან ამ ბანაკებში 6000-ზე მეტი უკრაინელი ბავშვი აღმოჩნდა, თუმცა მათი რეალური რაოდენობა, შესაძლოა, გაცილებით მეტი იყოს.
  • კვლევის თანახმად, ბანაკებს ოკუპანტები იყენებენ შვილად აყვანის მიზნით მიყვანილი ბავშვების დასაბინავებლადაც.
  • მსგავსი დაწესებულებების უმეტესობა ყირიმში მდებარეობს, თუმცა, ანგარიშის ავტორების მტკიცებით, რამდენიმე მათგანი მოსკოვთან, ყაზანთან და ეკატერინბურგთანაცაა.
  • ასევე, ბანაკები განთავსებულია ციმბირსა და შორეულ აღმოსავლეთშიც.