ყოფილმა დაქირავებულმა ექსკლუზიური ინტერვიუ CNN-ს მისცა.

რატომ არის მნიშვნელოვანი: ვაგნერის ჯგუფი რუსეთის არმიის არაოფიციალური სამხედრო დანაყოფია, რომელიც 2014 წელს შეიქმნა და მჭიდრო კავშირები აქვს პრეზიდენტ ვლადიმერ პუტინთან.

  • ჯგუფი არსად არ არის რეგისტრირებული როგორც იურიდიული პირი, რაც რუსეთს საშუალებას აძლევს მისგან დისტანცირდეს და მათ ჩრდილქვეშ იმოქმედოს.
  • ყირიმის ანექსიის შემდეგ პუტინის კერძო ჯარის ქმედებები გლობალური ხასიათის გახდა — ისინი ბრალდებულნი არიან ომის დანაშაულებში აფრიკაში, სირიასა და უკრაინაში.
  • ეს სამხედრო გაერთიანება ცნობილია ჯგუფის წევრების მიმართ სასტიკი მეთოდების გამოყენებითაც.

მედვედევი, რომელიც იქამდე რუსეთის ჯარში მსახურობდა, ვაგნერს მოხალისედ შეუერთდა.

  • 2022 წლის ივლისში უკრაინაში გაგზავნეს, სადაც დონეცკის რეგიონის ქალაქ ბახმუტთან მსახურობდა.
  • ამბობს, რომ კონფლიქტი ჰქონდა ჯგუფის დამფუძნებლებთან, დიმიტრი უტკინთან და ოლიგარქ ევგენი პრიგოჟინთან, რომლებსაც ეშმაკებად მოიხსენიებს.
  • გაქცეულ ვაგნერელს არ სურს იმის გახსენება, თავად რას აკეთებდა უკრაინაში ბრძოლის დროს, მაგრამ ჰყვება სხვების დანაშაულზე.
  • მისი თქმით, ვისაც ბრძოლა არ სურდა ახალმოსულთა თვალწინ ხვრეტდნენ: "მოკლულები დამარხეს ზუსტად იმ თხრილებში, რომლებიც იქ მყოფებმა გათხარეს".
  • CNN-ს განუცხადა ისიც, რომ უკრაინაში განლაგებიდან მეექვსე დღეს იცოდა, რომ აღარ სურდა ბრძოლის გაგრძელება, რადგან ხედავდა, როგორ გადაიქცნენ რუსი ჯარისკაცები ქვემეხის საკვებად.
  • ანდრეი 13 იანვარს ნორვეგიაში გაიქცა და თავშესაფარს ითხოვდა.

ტაქტიკა და ფინანსები: მედვედევის თქმით, ვაგნერს არ ჰქონდა ტაქტიკური სტრატეგია.

  • "ჩვენ უბრალოდ ვიღებდით ბრძანებებს მოწინააღმდეგის პოზიციის შესახებ. არ ყოფილა გარკვეული მითითებები იმის შესახებ, თუ როგორ უნდა მოვქცეულიყავით", — იხსენებს ის.
  • გავრცელებული ინფორმაციით, პატიმრებს, რომლებიც ვაგნერის ჯგუფში იბრძოდნენ უთხრეს, რომ მათი ოჯახები მიიღებდნენ ანაზღაურებას ხუთი მილიონი რუბლის ($71 000) ოდენობით, თუ ისინი ომში დაიღუპებოდნენ.
  • მაგრამ სინამდვილეში "არავის სურდა ასეთი თანხის გადახდა", — თქვა მედვედევმა.
  • უკრაინაში ბრძოლების დროს დაღუპული ბევრი რუსი "უბრალოდ დაკარგულად გამოცხადდა".