ინფორმაციას ფინანსთა სამინისტროს საგამოძიებო სამსახური ავრცელებს.

დეტალები: უწყების ცნობით, 5 პირი პასუხისგებაში მიეცა ჯგუფურად ყალბი საგადასახადო დოკუმენტების დამზადება-გამოყენების, მოტყუებით ქონებრივი დაზიანების, გულგრილობისა და ორგანიზებული ჯგუფის მიერ საქართველოს საბაჟო საზღვარზე, განსაკუთრებით დიდი ოდენობით მოძრავი ნივთის გადმოტანის საქმეზე.

  • როგორც საგამოძიებო სამსახური აღნიშნავს, გამოძიებით დადგინდა, რომ ბრალდებულებმა მათი მართვის ქვეშ მყოფი კომპანიების სახელით, ერთმანეთში გაწერეს ყალბი საგადასახადო ანგარიშ-ფაქტურები, თითქოსდა განახორციელეს მარცვლეულის ყიდვა-გაყიდვის ოპერაციები, რა გზითაც უსაფუძვლოდ შეიქმნეს 150 961 ლარის ოდენობის დღგ-ს ყალბი აქტივი, რომელიც შემდგომ გამოიყენეს მიმდინარე გადასახადების დასაფარად.

გარდა ამისა, ფინანსთა სამინისტროში განმარტავენ, რომ 2022 წლის აგვისტო-ოქტომბრის პერიოდში, ბრალდებულებმა, უკანონო მატერიალური სარგებლის მიღების მიზნით, ორი კომპანიის სახელით, საბაჟო დეკლარაციაში ყალბი მონაცემების შეტანის გზით, საქართველოს ტერიტორიაზე შემოიტანეს დიდი ოდენობით — 447 742 ლარის საბაჟო ღირებულების 476 347 კილოგრამი არადეკლარირებული ხორბალი.

  • უწყებაში აცხადებენ, რომ სახელმწიფო ბიუჯეტზე მიყენებულმა ზიანმა დაახლოებით 231 000 ლარი შეადგინა.
  • "ამ ეტაპზე მხარის მიერ სახელმწიფო ბიუჯეტში ზიანის ანაზღაურების სახით შეტანილია 170 000 ლარი. ტარდება შესაბამისი ღონისძიებები აღნიშნულ დანაშაულში მონაწილე სხვა პირების დადგენა-მხილებისა და სახელმწიფო ბიუჯეტზე მიყენებული დარჩენილი ზიანის დაფარვის უზრუნველსაყოფად", — წერია ფინანსთა სამინისტროს საგამოძიებო სამსახურის განცხადებაში.