ფოთის მერიის ინფორმაციით, ძლიერი ქარი ამ დრომდე ნარჩუნდება.

რატომ არის მნიშვნელოვანი: რამდენიმე დღეა, დასავლეთ საქართველოში სტიქიას ებრძვიან.

  • ძლიერმა ქარმა დააზიანა ელექტროგადამცემი ხაზები და ბუნებრივი აირის მილები, რის გამოც ზოგიერთ რეგიონში ჯერ კიდევ არ აქვთ გაზი და ელექტროენერგია.
  • ქარმა სახურავი გადახადა საცხოვრებელ სახლებს, დააზიანა სასკოლო ინფრასტრუქტურა, საახალწლო ნაძვის ხეები და განათებები.
  • წაქცეული ხეების გამო პერიოდულად იხერგება გზებიც.
  • მუნიციპალიტეტები მოსახლეობას მოუწოდებენ, სტიქიით გამოწვეული სხვადასხვა სახის საფრთხის ან დაზიანების შემთხვევაში, მიმართონ გადაუდებელი დახმარების ოპერატიული მართვის ცენტრს, 112-ს ან დარეკონ თვითმმართველი ორგანოების ცხელ ხაზზე.

დეტალები: პირველადი მონაცემებით, ქარმა ფოთში დააზიანა 32 მრავალსართულიანი საცხოვრებელი ბინა, 120 კერძო სახლის, 4 საჯარო სკოლისა და 1 საბავშვო ბაღის სახურავი.

  • მერიის განცხადებით, მოგლეჯილია ათეულობით მრავალწლოვანი ხე, ასევე, მნიშვნელოვნადაა დაზიანებული სკვერები, მოედნები, ტროტუარები, ელექტრო გადამცემი სადენები, ბოძები და საახალწლო განათებები.
  • "ელექტრო ენერგია არ მიეწოდება ქალაქის გარკვეულ უბნებს. ენერგო-პრო ჯორჯიას ჯგუფები უწყვეტად აგრძელებენ აღდგენით სამუშაოებს", — აცხადებენ მერიაში, სადაც სტიქიასთან გასამკლავებლად საგანგებო შტაბია შექმნილი.