საქართველოს პარლამენტის თავმჯდომარეს, ირაკლი კობახიძეს, უმრავლესობის გარდა, პარლამენტის სხვა წევრებთან და სახალხო დამცველთან საზოგადოებრივი მაუწყებლის სამეურვეო საბჭოს შესარჩევი კომისიის დაკომპლექტებასთან დაკავშირებით კონსულტაციები არ ჰქონია. ამის შესახებ ინფორმაცია On.ge-ს პარლამენტში უმრავლესობის მიღმა დარჩენილმა დეპუტატების ნაწილმა და სახალხო დამცველის აპარატში განუცხადეს.

მაუწყებლობის შესახებ (მუხლი 25, პუნქტი 3) კანონით, საქართველოს პარლამენტის თავმჯდომარე საპარლამენტო უმრავლესობასთან, საპარლამენტო უმრავლესობის გარეთ დარჩენილ პარლამენტის წევრებთან, აჭარის ავტონომიური რესპუბლიკის უმაღლეს საბჭოსთან და საქართველოს სახალხო დამცველთან კონსულტაციების შედეგად საქართველოს პარლამენტს დასამტკიცებლად წარუდგენს საკონკურსო კომისიის წევრთა კანდიდატურებს.

სახალხო დამცველის აპარატში ამბობენ, რომ მათ სამეურვეო საბჭოს შესარჩევი კომისიის წევრების შესახებ არავინ დაკავშირებით და მიზეზებს არკვევენ. კავშირი არ შემდგარა არც საპარლამენტო უმცირესობასთან, ევროპული საქართველოსთან და არც ნაციონალურ მოძრაობასთან.

"არც წინა წლებში მოუკლავთ მაინცდამაინც თავი კონსულტაციით, თუმცა, შეთანხმება მაინც იყო ხოლმე," - განუცხადა On.ge-ს ევროპული საქართველოს წევრმა, ლევან თარხნიშვილმა.

მედიის განვითარების ფონდის იურისტი მარიამ პატარიძე ამბობს, რომ თუ პარლამენტის თავმჯდომარემ კომისიის სიის დაკომპლექტებამდე საპარლამენტო უმრავლესობასთან, უმრავლესობას მიღმა დარჩენილ დეპუტატებთან, აჭარის უმაღლეს საბჭოსთან და სახალხო დამცველთან კონსულტაციები არ ჰქონია, ამით კანონი დაირღვა.

"ეს არ არის პარლამენტის თავმჯდომარის დისკრეცია, გამართავს თუ არა კონსულტაციებს. თუ კონსულტაციის გარეშე დააყენებს კომისიის წევრებს დასამტკიცებლად, მათი წარდგენა და დამტკიცება არ იქნება კანონიერი," - აღნიშნა პატარიძემ On.ge-სთან საუბრისას.

სატელეფონო ზარებს არ უპასუხეს პატრიოტთა ალიანსში, რომელიც ასევე არის საქართველოს პარლამენტში შემავალი პარტია. გარდა ამისა, On.ge მესამე დღეა ცდილობს პარლამენტის თავმჯდომარის, ირაკლი კობახიძის კომენტარის მიღებას, თუმცა, უშედეგოდ.

კომისიის შექმნის პროცესში ჩართული არ იყო საპარლამენტო უმრავლესობის, ქართული ოცნების წევრი, რომან კაკულიაც, თუმცა, ფიქრობს, რომ კომისია კანონით მოთხოვნილი კრიტერიუმებით დაკომპლექტდა. მისი თქმით, კომისიის წევრები "პარლამენტის ხელმძღვანელობამ" დააკომპლექტა, რომლებშიც კომიტეტებისა და ფრაქციების ხელმძღვანელებს მოიაზრებს.

"ნდობა მაქვს ხელმძღვანელობის მიმართ, რომ ამ პრინციპით შეარჩევდნენ," - აღნიშნავს დეპუტატი.

რომან კაკულია On.ge-ს დაპირდა, რომ გაარკვევდა საქართველოს პარლამენტის თავმჯდომარემ საზოგადოებრივი მაუწყებლის სამეურვეო საბჭოს წევრის შესარჩევი კომისია კონსულტაციების შემდეგ წარუდგინა პარლამენტს თუ არა. კაკულია ამ პირობის გაცემის შემდეგ სატელეფონო ზარებს არ პასუხობს.

აჭარის უმაღლესი საბჭოს პრესსამსახურიდან ორი დღის კომუნიკაციის შედეგად გაირკვა, რომ მათ კომისიის წევრები შეუთანხმეს და არანაირი პრეტენზია ან კითხვა არ გაჩენილა. თუმცა, მანამდე აღნიშნა:

"ჩვენი თემა არ იყო, ჩვენთან არ უნდა შეთანხმებულიყო. ეს თბილისს ჰქონდა გამოცხადებული, ჩვენთან [აჭარის ტელევიზიაში] რომ გამოცხადდება, რა თქმა უნდა, ჩვენთან შეთანხმდება."

თითქმის ერთი წელია, რაც ცხრაწევრიანი სამეურვეო საბჭო რვა წევრით არის დაკომპლექტებული. ამ შემთხვევაშიც, ვაკანტურია უმრავლესობის მიერ დასასახელებელი მეურვის კვოტა. კონკურსი ამ ვაკანტური თანამდებობის დასაკავებლადაა გამოცხადებული. მეურვის თანამდებობა მას შემდეგ გახდა ვაკანტური, რაც ნათელა სახოკიამ, შვილის - ირაკლი რუხაძის ტელეკომპანია იმედის სამეთვალყურეო საბჭოს თავმჯდომარედ დანიშვნის გამო, 13 ივნისს დატოვა.