აშშ-ის სახელმწიფო დეპარტამენტი აზერბაიჯანელი ჟურნალისტის, აფგან მუხტარლის საქმესთან დაკავშირებით განცხადებას ავრცელებს, სადაც საქართველოს მთავრობას მოუწოდებს, რომ მიმდინარე გამოძიება იყოს დროული და გამჭვირვალე:

"ამერიკის შეერთებული შტატები შეწუხებულია 30 მაისს, აზერბაიჯანელი ჟურნალისტის, თბილისში, სავარაუდო გატაცებისა და მოგვიანებით აზერბაიჯანში მისი დაკავების გამო. ასევე შეწუხებული ვართ, 25 მაისს აზერბაიჯანში ეროვნულ ფრონტის თავმჯდომარის მოადგილის, გოზალ ბაირამლის დაპატიმრებით.

ჩვენ მოვუწოდებთ აზერბაიჯანის მთავრობას, საერთაშორისო და ეუთოს დონეზე ნაკისრი ვალდებულებების შესაბამისად, გაათავისუფლოს ყველა ის პირი, რომელიც საკუთარი ფუნდამენტური თავისუფლებით სარგებლობის გამო დააკავეს.

ჩვენ ახლოდან ვაკვირდებით გამოძიებას, რომელიც საქართველოში მიმდინარეობს, სავარაუდო გატაცების შესახებ და მოვუწოდებთ მათ, რომ იგი იყოს გამჭვირვალე და დროული".

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.