აფგან მუხტარლის ადვოკატებმა დღეს, 3 ივნისს ადამიანის უფლებათა სახლში პრესკონფერენცია გამართეს, სადაც საქმის დეტალების შესახებ კიდევ ერთხელ ისაუბრეს და განაცხადეს, რომ გეგმავენ პროკურატურას მიმართონ გამოძიებისთვის:

"არ გამოვრიცხავთ, რომ მივმართოთ მთავარ პროკურატურას, რადგან ამ დანაშაულის ჩადენის ადგილი არის არა მხოლოდ თბილისი, ეს დანაშაული გაგრძელდა მთელი საქართველოს საავტომობილო გზის მიმდებარედ. მთელი გზის განმავლობაში, ამ ადამიანს თავისუფლება უკანონოდ ჰქონდა აღკვეთილი, ამიტომ ესაა მთავარი პროკურატურის გამოსაძიებელი საქმე".

მუხტარლის აზერბაიჯანელი, ადვოკატი მემატ ქარიმლი თბილისშია და პრესკონფერენციაზე საუბრისას მან თქვა, რომ დაკავებიდან ორი-სამი დღე, აფგან მუხტარლისთვის სამედიცინო მომსახურება არ გაუწევიათ, ხოლო წითელი ჯვრის წარმომადგენლებს მისი მონახულების უფლება არ მისცეს:

"გამტაცებლები იყვნენ კრიმინალური პოლიციის ფორმებში. მათ ფიზიკური შეურაცხყოფა მიაყენეს მუხტარლის. ყოველ ოც წუთში რეკავდნენ და ატყობინებდნენ, რომ ჟურნალისტი ბაქოში მიჰყავდათ. ადამიანს ვისაც ურეკავდნენ, მიმართავდნენ ტერმინით "გენერალო". აფგანს დღემდე ეტყობა სხეულზე ფიზიკური დაზიანებები".

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.