2022 წლის მოდის დაჯილდოებაზე, რომელიც ლონდონში გაიმართა, ბელა ჰადიდი წლის საუკეთესო მოდელად დაასახელეს. სამწუხაროდ, ბელა ჰადიდმა ჯილდოს პირადად მიღება ვერ შეძლო, თუმცა ვიდეომიმართვით დამსწრე საზოგადოებას მადლობა გადაუხადა.

"თქვენ ყველამ, ჩემმა მოდის ოჯახმა, დამანახეთ, თუ ვინ შემეძლო გავმხდარიყავი და თვალები ამიხილეთ იმაზე, თუ რისი გაკეთება შემეძლო. მინდა, ეს ჯილდო ყველა იმ მოდელს გავუზიარო, რომელიც ყოველდღიურად ეკრანებზე ჩნდება და მცირე აღიარებისთვისაც კი ბევრს შრომობს. ვიცი, რომ ეს ადვილი არ არის და მე ყველა თქვენგანს ვამჩნევ. ეს ჯილდო ყველა ჩვენგანისაა", — განაცხადა ბელა ჰადიდმა.

ფოტო: Getty Images

ბელა ჰადიდი დიდი ხანია, რაც სხვადასხვა ცნობილი ბრენდის სახეა და მათ რეკლამებში მონაწილეობს. Forbes-მა 2018 წლის მიწურულს ყველაზე მაღალანაზღაურებადი მოდელების სია გამოაქვეყნა, რომელშიც ბელა ჰადიდი მე-8 ადგილს იკავებდა. 2019 წელს კი ოქროს კვეთისა და ფიზიკის სილამაზის სტანდარტების მიხედვით, პლანეტის ულამაზეს ქალად ბელა ჰადიდი დასახელდა.

გარდა ამისა, ბელა ჰადიდი მენტალურ ჯანმრთელობასა და იმ საერთო პრობლემებზე საჯაროდ ხშირად ლაპარაკობს, რომლებიც ყველას აწუხებს, მაგრამ ამაზე ხშირად ღიად არ ვსაუბრობთ. გასულ წელს ბელამ ინსტაგრამზე ვიდეო გამოაქვეყნა, რომელშიც ამბობდა, რომ სოციალური მედია ყალბია, რაზეც მას უამრავი გულშემატკივარი დაეთანხმა.

თუ სტატიაში განხილული თემა და ზოგადად, მენტალურ ჯანმრთელობასთან დაკავშირებული საკითხები თქვენთვის საინტერესოა, შემოგვიერთდით Facebook ჯგუფში – მენტალური ჯანმრთელობის ფორუმი.