ვოპკე ჰოექსტრა ოფიციალურ პირებთან შესახვედრად დედაქალაქში დღეს, 15 ნოემბერს დილით ჩავიდა.

რატომ არის მნიშვნელოვანი: ქალაქზე იერიში ოკუპანტებმა დღესაც მიიტანეს — ისმოდა საჰაერო განგაშიც.

  • უკრაინული მედიების ინფორმაციით, ბომბი საცხოვრებელ სახლს მოხვდა — დაიღუპა, სულ მცირე, ერთი ადამიანი.
  • ეს პირველი შემთხვევა არ არის, როდესაც ოკუპანტების თავდასხმის გამო უკრაინაში ჩასულ ოფიციალურ პირებს თავშესაფარში გადასვლა უწევთ.

დეტალები: მინისტრმა CNN-ს უთხრა, რომ მნიშვნელოვანია ყურადღება მიექცეს არა იმას, რასაც რუსეთი ამბობს, არამედ იმას, რასაც ის აკეთებს.

  • მისი თქმით, დღევანდელი თავდასხმა კიდევ ერთხელ აჩვენებს, რომ პუტინი მზადაა, კრიმინალურ მეთოდებს მიმართოს.
  • "ამაზე მხოლოდ ერთი პასუხი შეიძლება იყოს — უკრაინის მხარდაჭერის გაგრძელება, იარაღის მიწოდების გაგრძელება, მუშაობა სამართლიანობაზე, ჰუმანიტარული დახმარების მიწოდებაზე".
  • "ეს მხოლოდ უზარმაზარი მოტივატორია, რომ დავრჩეთ მათ გვერდით", — თქვა მან რუსეთის სარაკეტო იერიშზე.

თავდასხმა ენერგეტიკულ სისტემაზე: ვიტალი კლიჩკოს განცხადებით, მასიური სარაკეტო შეტევის გამო, მთელ უკრაინაში ელექტროენერგიის გადაუდებელი გათიშვა გახდა საჭირო, დედაქალაქის ნახევარი კი დენის გარეშეა დარჩენილი.

  • უკრაინის ენერგეტიკის მინისტრის თქმით, დღეს, 15 ნოემბერს ოკუპანტებმა ომის დაწყების შემდეგ ენერგეტიკულ სისტემაზე ყველაზე მასიური დაბომბვა განახორციელეს.
  • ვოლოდიმირ ზელენსკი კი ამბობს, რომ დღეს უკრაინის მიმართულებით ოკუპანტებმა 80 რაკეტა გაუშვეს, მათი უმრავლესობა კი ენერგეტიკული ობიექტების წინააღმდეგ იყო მიმართული.